Read Tangkhul Naga JOB 37 Bible Online

JOB 37 - Tangkhul Naga bible

JOB 37

¹“Hiwui vang einala ining kathirda malungtātunghaowa.

²Awui khangashumkhon kala akhamorwui eina kakhangang chi nganālu.

³Kazingram peida vāshung ngasaka, kala okathui achikun mati peida awui rikhān ngasheingasaka.

⁴Chiwui thili awui khon nirvai; awui khangamkhon eina kakhanganga awui khon kashā tharan, rikhān khangashei ana makhāmmana.

⁵Varena tekmateilak eina ngashum ngasaka; ithumna matheikhuikharar hakkhamahā kachungkha sai.

⁶Kaja horamli ana ngaleitungli tālu da hānga; kazing khamar eina zingrotlila pangmeilu da hānga.

⁷Awui otsak mi saikorana theikhavai mi kachiva̱wui pāng ngasām ngasaka.

⁸Chieina sāyurna athumwui ngayin khavai apamli ungda, akhurli ungpama.

⁹Sikhurwui eina sur khaningshoka, kala masi kaphanwui eina khamakui shoka.

¹⁰Varewui khakkhā eina phāmkok shoka. Kala tara̱ sorkhangasai chi thākta ngachinghaowa.

¹¹Ana muiyā kashā chili nimngasaka; awui rikhān muiyāna chaivai.

¹²Okthuikapai apuk-apagwuitungli athumli ana kaso kahai saikora chi ungshungpai khavai, awui thankhami eina athumli kuizat ngasaka.

¹³Mashungkhui khavai nilala, lah awui ngaleiwui vang, lah leikashiwui vang ana hithāda shokkhangasakna.

¹⁴O Job, hi nganālu; ngasāmkhuida Varewui matakhak kahai ot hi machukkhuilu.

¹⁵Varena athumli kathāda kasoda, kala muiyāwui rikhān khangashei kathāda horngasakhala kaji na theila?

¹⁶Theikakhui kākashungawui matakhak kahai otsak, muiyāna kathāda ngaraichāda ngashingzatkhala kaji theila,

¹⁷azingshongwui masina okathui hi va̱rihap kahai tharan, nawui kashankachonbing kasāna thengkhangasak nana theila?

¹⁸Khamakanga sākharik kahai mingshen kathā kazingram hi nana awui thāda phayaishokshaprala?

¹⁹Ali ithumna khi hāngrakhala da ithumli tamchitheilu; tangkhamangwui vang ithumwui tuingaphun makhuishokrarmana.

²⁰Ina matuira kaji ali hāngrala? Mi akhana ali mayuisang khavai kahaokasaila?

²¹“Masina phanthuihaida kazingram tharzā kahai tharan, kazingram chi horchāmrihaiakha mina kahorli mayangkārarmana.

²²Atungshongwui eina sināwui tekhamatei shoka; Varena mahāngkharar tekhamatei eina sāri shaksai.

²³Pangshapa chili ithumna maphākhuirarmana; a pangshap eina mashun hakmahālaka, makhavāta khamashung khangarong ana masāshimānmara.

²⁴Chiwui vang eina ali mina ngachee, thangmeikharek konkathembingli ana machāpmimana.”