Read Tangkhul Naga JOB 38 Bible Online

JOB 38 - Tangkhul Naga bible

JOB 38

¹Chiwui thili PROHOna sur akhanin eina Jobli ngahānkai:

²Awor kathem maleila hāngmachinphāphā kaji hi khipākhala?

³Mayarnao thāda shānneira̱ neilu, ina nali ngahānra, nana ili ngahānkālu.

⁴“Ina okathuiwui shimphunga kasā tharan na kali leisā? Ili hānglu, nana theikakhui leiakha.

⁵Khipāna chiwui asān-aret onkhala— nana theida leira! Lha khara̱ chi khipāna chiwuitungli ngakhunvā?

⁶Khiwuitungli chiwui pākra̱bing khaningkhui, lah lungkhoka chi khipāna shun,

⁷ngathor sirābingna laa sākhangarum, kala Varewui naomayarbingna mathānda khavao katharankhala?

⁸“Naopamwui eina ngawokhaikashok tharan khipāna shamadru khāmong shung;

⁹ina muiyā chi chiwui sāri sāmi, kala tangmangting kahai china naokhalui sāmi,

¹⁰ kala chiwui thari shommi, kala khāmong kala phākashut sāsangda,

¹¹‘Hirankha vālu, chili malāngvāpaimara, nawui kapanga khangaphao hieina tangra” da mahāngmala?

¹²Nawui atam haokaphok eina thuida ngathorli nana kakasoyanghairala, kala zingthanlamli awui pam kachitheihairalā,

¹³chithāda okathuiwui amareili singkhuida, makhayābingli kathantārala?

¹⁴Leikhonli mahor namda kala kachon machu teihaida ngachei khangasaka kathāna.

¹⁵Makhayābingwui eina kahor khuithuihaowa, kala athumwui pangshap yāng katathai.

¹⁶Yireiwui ura̱bing chi nana zangtheihairalā, maningkha kathuka chiwui alungli kazathairala?

¹⁷Kathiwui ngaveibing nali chithei hairalā, lah kathuka tangmangting kahaiwui ngaveibing nana theihairala?

¹⁸Okathuiwui khamashā machukhuihairala? Hāngchitheilu, nana saikora hi theiakha.

¹⁹Kahor pamkhavaili vākhavai shongfa kachishong lei, tangkhamangwui apam kali lei,

²⁰chiwui ramli nana thanvāda, shim chiwui shongfa chi nana chitheishaprala?

²¹Nana thei, kaja nali chitharan pharāhaira̱sai, na rarshunhaira!

²²Horam kazipshimbingli na zanghairalā, kala theih kazipshimbing na theihairalā,

²³chibing chi khonkazar atamwui vang kala rai kasā atamwui vang ina kazip kahai maningmala?

²⁴Kahor ngayar khavaipamwui shongfa kachi, lah okathuili zingshoshongwui masi kachi eina phanshok?

²⁵Zingrot rotā khavai khipāna akhur sāphut, kala lāngpar tākkhavai khipāna apong sem,

²⁶mi makhaleipamli kazing rokhavai, mi makhalei siwuktungli;

²⁷ngalei khamasai eina mina ramphoda horkahai ngaleili chirchom khavai kala thingnā-ra̱hā phorkhavai maningmala?

²⁸Zingrotwui avāva̱ leila, lah iknguira̱li khipāna pharā?

²⁹Phāmkok hi khipāwui naopam eina shok, kala kazing eina katā phāmli khipāna pharā?

³⁰Tara̱na ngalung thāda mararhaowa, kala kathukawui amai ngachinghaowa.

³¹ Sirā Pleiadeswui mari khanghuibing nana khalapshaprala? lah Orionwui khara̱bing nana khalāshaprala?

³²Mazzarothli athumwui atam athishurda thānvāshapralā, lah Bear eina anaoli nana thānzatshaprala?

³³Kazingramwui shiyan-chikan na theila? Athumwui zatkhanā chi okathuilila nana zatnāshap ngasakshaprala?

³⁴Nali tara̱na phongror khavai muiyāli nana vaokāshapla?

³⁵Nana rikhān chihoshokta china vālaga ‘Ithum hili leili’ da hāngngasakshaprala?

³⁶Muiyālungli thangkhamei ning, lah leichuili theithangkhamei khipāna sangmikhala?

³⁷Thangkhamei eina khipāna muiyābing shānkhuishapkhala? Lha khipāna kazingramwui tara̱ham heitha̱shaprakhala,

³⁸chifana ngaching kahai tharan kala leitang sākahai tharan khipāna shānkhuishapra?

³⁹Kazingkha̱wui sāshai nana rengmishaplā, lah kazingkha̱naobingli nana phauishapla?

⁴⁰athum akhurli pamlakha, maningakha athumwui ngathum khavaili leilakha?

⁴¹Kashakazā khavātwui vang kuiung kuivāda hangkhā anaobingna Vareli ngakaokakā tharan, hangkhāli khipāna zākhavai mikhala?