Read Tangkhul Naga JOB 39 Bible Online

JOB 39 - Tangkhul Naga bible

JOB 39

¹Kaphungwui mebing katharan pharākhala kaji na theila? Chaolāna nao kapharā na yanghairala?

²Athumna karankha vaikhala, kala katharan pharārakhala kaji theila,

³ngaleili ngakhumsangda athumwui nao kapharā chi theila?

⁴Anaobing china pangsangda ramreili rarsanga; athumna thuihailaga ava̱ngarāli malatungluimana.

⁵Khararwui gadhāli khipāna chipenhaokhala? Kathaka gadhāli kakhalap khipāna khalāhao,

⁶khangaipam awui shim ngasā khavai kala machipamli awui ngasām khavai ina ali khami maningmala?

⁷Keinungwui khonkazar chili ana mana̱shi; thaokazatawui khavaokhon mashāmimana.

⁸Awui seihomphung sāda kaphung kuimareida phāshaizata, kala khamateka thingnā-ra̱hā kachiva̱ chi phāzata.

⁹Khararwui mukvāna nali otram ngathangaila? Nawui seishimli thangngayākha pisangngairala?

¹⁰Ngarā kachangli ali seipeng eina hokhaishapralā, maningkha tampāk chi nawuivang ana khuimirala?

¹¹A panglākhaowada nana ali chihamlā, nawui ngalang chi ali haimirala?

¹²A latungluira kala nawui ranpumli māthei phungungmira da shitsangla?

¹³Ostrich vānaona langsosor angachāng kathana kha chi leikashiwui angachāng kala ahahla?

¹⁴Ana ara̱ phara̱hailaga ngaleili nothāhaida khalatta lumngasaka,

¹⁵pheina naiza̱ra kala ramsāna naikazamra kajila malaihaowa.

¹⁶Awui nao makhaning thāda anaongarāli sāshida sai; awui ngalang aremana jilala khikha mangangmana,

¹⁷khikhalajila Varena ali thangkhamei malai ngasakhaowa, kala theikhuikathei ali mayarmana.

¹⁸Ana yāmthui khavai ngakarkathui tharan, sigui eina katongali ana mana̱rora.

¹⁹Siguili awui pangshap nana mila? akahungli nana yāng sangmila?

²⁰Nana ali khaoh thāda ngawok ngasakla? Awui kakhahek khangachee khonna.

²¹Ana tampākli kathanga, awui pangshapli langsoi; zeighai ngahāli ngasung khavai angaroka.

²²Khangachee chili ana mana̱rora, malungla maringmana; raighaiwui eina mangalanmana.

²³Awuitungli malākhong khalongkazama, kahāna zeipa̱ kala kazei pharkachupvai.

²⁴Sākashi kala malungkhavāt eina ngalei mayuisanga, talla̱khonli ana kasaikha manganingrarmana.

²⁵Talla̱ kakhong tharan, ‘Aha!’ ji. Katāva̱wui eina rai khangarar chi ana theishapa, kathānabingwui khavaokhon raikhon raikhak.

²⁶“Khalāngna kajuiva̱li yongkakā kala azingshong angachāng hārlaga khayong nawui thangkhamei einala?

²⁷Khalāngna yongkāda kajuiva̱li athip kākasā nana kakasola?

²⁸Khamakanga kajuiya lungkaitungli awui shim sāda soma.

²⁹Chiwui eina awui sāshai ra̱yanga; amikna chi katāvali theivāshapa.

³⁰ Anao ngarāna ashee zima; kala kathi khaleipam chili a lei.”