Read Tangkhul Naga JOB 40 Bible Online

JOB 40 - Tangkhul Naga bible

JOB 40

¹Kala PROHOna Jobli hānga:

²“Khayon phākazata mina Sashap-pangshapali ngasungrala? Vareli khangayāta china hi ngaha̱nkāranu.”

³Chieina Jobna PROHOli ngahānkai:

⁴“Yanglu, iya khikhala maningmana, ina nali khi ngahānkāra? Ipang eina khamor kafaya.

⁵Akhashida hānghaira, mangahānkāluimara; khani shida ina mahangluimara.”

⁶Chieina PROHOna sur akhanin eina Jobli ngahānkai:

⁷“Mayarnao akha thāda shaneira̱ neikhuilu; ina nali ngahānra, nana phongmilu.

⁸Nana ili khayon eina tangda yonngasakrala? Na mashung khavai ili phenrala?

⁹Napāngthei Varewui thālā, na awui khon thāda ngashumshapla?

¹⁰Chieina ngam kala khayākakā eina ngasoda na khalatta shaksāhailu, tekhamatei eina ngasoda na khalatta chonvai sālu.

¹¹Nawui malungkhavātna pemkahai chi heitha̱haolu, kala langkaso kachiva̱li yangvālu, ali khayāmalā ngasaklu.

¹²Langkaso mi kachiva̱li yangda, ali nemta ngasaklu; kala makhayā mibingli nganingson eina naitālu.

¹³Chifalungli athum saikora thumserhaolu, athumli kathiramli khalaphaihaolu.

¹⁴Chithākha na khalattawui yāpāngna nali khayui mishapada ina shānkhuira.

¹⁵Yanglu, Behemothli, nali kasa thāda alila ina sākhui; ana mukkā thāda khawo shai.

¹⁶Yanglu, awui kashanli awui yang; kala awukwui aphili awui pangshap lei.

¹⁷Akhamei chi cedarthing thāda marar ngasaka; akhaishāngwui anonanbing sākkhamānga.

¹⁸Ara̱kui pithraiwui utongna, arapthingra̱ maringum thai.

¹⁹Varena sākhare chi ana, ali kasaa china awui raighai ngalemli khuirāranu!

²⁰Kaja ramsā saikorana ngareo khavai kaphungbing chili awui zākhavai shokmi.

²¹Thambalrong kathui azingli titi hurning kahai apamli ana ngaleopama.

²²Kaja thambalrongna fakham khavai khaya̱ sāmi; kongpheili kaphor faborthingna ali kuimarei.

²³Yanglu, kong thuilala ana mangacheemana; Jordanna khamorli longsanglala ning lumturhai.

²⁴Ali khipāna khaisui eina suikhuishapra, lah khipāna khalen eina nārenmishapra?