Read Tangkhul Naga JOB 41 Bible Online

JOB 41 - Tangkhul Naga bible

JOB 41

¹ Leviathanli nana khaisui eina suikhuishapralā, lah amale khara̱ eina hokkhuishaprala?

²Nana narenmishapralā, lah amakhāli mari eina ruisangshaprala?

³Ana nali chihomi khavai porala? Ana nali khanim tui eina hāngrala?

⁴Katang maleila nawui rao sākhavai ana nali tuingashit sārala?

⁵Vanaoli ngareokhanganao thāda alila ngareopairalā, lah narao sha̱naobingwui vang ali narhaipairala?

⁶Leihkhalonbingna longairala? Athumna ali leihkhalonbingli ngayarmirala?

⁷Awui ahuili zeisa̱nao eina lah akuili zeimajo eina ngashumda zangrala?

⁸Ali napāng parlaga rai khangarar phaningyanglu, na masārarluilakmara.

⁹Yanglu, miwui kachihān maungshungrarthura; awui mikyanli a teolakhaira.

¹⁰Khipākha sāshilakhaowada ali mangakarthui ngasaklengmana. Chithākha iwui mangāli nganingshapki kaji a chi khipākhala?

¹¹ Ina runlui khavai khipāna ili chishuthaikhala? Kazingram azingli khalalei katonga iwuisera.

¹²“Awui pheipāng lah yāng kapang phasā mathālak kahaiwui pongli ina kasaikha mapammara.

¹³Awui kachon khamato khipāna raimishaprakhala? Awui phahon khangapho chili khipāna ngataiphupsangshapkhala?

¹⁴Awui mai khāmong khipāna shoshaprakhala? Awui kuikhamarei ahā chi khangacheena.

¹⁵Akhumkhor chāngvei pareng eina sāsangda mahor namshāntit kahai thāda sakahaina.

¹⁶Akha eina akha ngavapnāhaida angachaili masi mazangrarmana.

¹⁷Akha eina akha napshān ngarokhaida makhalākhaipaimana;

¹⁸Ana hākthiakha kahor kāpshoka, amik zingthanlamwui kahor thai.

¹⁹Akhamorwui eina meirāwui meiwon shokta meiwui meipā pha̱pha̱ shoka.

²⁰Phinam kachui kala ham khangatarwui eina meikhut kashok thāda awui nātangkhurwui eina meikhut shoka.

²¹Awui khakkhāna mahaila mei sākai, kala akhamorwui eina meiwon shoka.

²²Akahungli yāng lei, awui mangāli khangachee leishon leithai.

²³Awui aphi katonga napshānserda mangatha̱ ngasakrarmana.

²⁴Amalung ngalunggui khamarar thai, mā rungkhavai lunggui thāda marara.

²⁵Ana ngakarkathui tharan kapangabingna ngachee; kakathang eina athum khalatta yāma.

²⁶Raikhai eina ali shātlala mazangmana, kazeila shilenkhara̱la zeimajola chisera.

²⁷Awui vang marila lanji, pithraila thingpār kathāna.

²⁸Malā eina ali makashamrarmana; awui vanga thailungtheila lanji kathāna.

²⁹Thinghunla lanjikung kathāna; zeimajo kapharkhonli mana̱rora.

³⁰Awukshong kazana hamkai kathāna; kala manuisa̱ kahai leipātungli mā shaokhavai karhui thāda ana ngayaipi.

³¹Kathuka chi ana ham thāda ngatar ngasaka; shamadrula neokhavai thaokhong ngasā ngasaka.

³²Akhanukli kahān shokngasaka, kathuka chi charshihaira da mina phaningra.

³³Khangachee makhavai a kathā okathuili maleimana.

³⁴Ana kajujui kachiva̱li yanga; ana langkaso naomayara saikorawui awungana.”