Read Tangkhul Naga JOB 42 Bible Online

JOB 42 - Tangkhul Naga bible

JOB 42

¹Chieina Jobna PROHOli ngahānkai:

²“Nana ot saikora shapsera kaji ina thei, kala nawui sākhangai akha eina tangda mahorhaipaimana.

³ ‘Theikakhui maleila hāngkachithei thumkahai khipākhala?’ Chiwui vang eina ina matheikhuila hāngphāphāhaira, ina makathei matakhak kahai otbing chi.

⁴ Nganāmilu, ina hāngra; ina nali ngahānka, kala nana ili hāngchitheilu!

⁵Nawui pongli ikhanā eina shāhairasai, kha ara imik eina nali theihaira;

⁶chiwui vang I khalatta ningkachaiya, kala chifa eina hotlālungli ining ngateili.”

⁷PROHOna ali tui hi hāngkahaiwui thili Temanwui Eliphazli PROHOna hānga: “Na eina nawui ngasota khanili khamashung tui makhamatuiwui vang iwui malungkhavāt tāshunghaira; kaja iwui rao Job thāda iwui pongli nathumna khamashung chi mamatuimana.

⁸Chiwui vang eina mukkā shini, yaovā shini khuilaga iwui rao Jobwuili nathum khalattawui vang rikkatāchigat chigatlu; kala iwui rao Jobna nathumwui vang seihā sāmira, kaja nathumwui mangma̱sak athishurda nathumli masā khavai awui seihā kasā ina khuisangmira; kaja iwui rao Jobna kasā thāda iwui pongli nathumna khamashung chi mamatuimana.”

⁹Chieina Temanwui Eliphaz, Shuhwui Bildad, kala Naamathwui Zopharna vāda athumli PROHOna hāngkahai chi sai; kala PROHOna Jobwui seihā kasā khuisangmi.

¹⁰ Awui ngasotabingwui vang Jobna seihā sākhami tharan, PROHOna Jobwui lan hanmiluishita. Kala awui rida leikasā chili khanishida mataida mi.

¹¹Chiwui thili agato ngarā, azara̱ ngarā, kala ali rida theikasābing saikorala awuili rāda awui shimli phazāngaruma; kala PROHOna awuitungli kachotkachāng khamiwui vang lukhamashan chitheida ali ringphā ngasaka; kala mi kachiva̱na lupā akharip, sinā khutop akharip da mi.

¹²Kala PROHOna Jobwui shingāshongwui mirin kharewui mirinli chungmeikharda somi; ana yao thingtharāda mati, ut thingtharuk, mukkā thingkha, kala gadhā ava̱ thingkha da leisai.

¹³Naomayara shini, naongalāva̱ kathum da pharai.

¹⁴Khararpāva̱wui ming Jemimah hoi, kakhanepāva̱wui ming Keziah kala kakathum pava̱wui ming Keren-happhuch hoi.

¹⁵Kala apam kachiva̱li Jobwui naongalāva̱ kathā khamathā maleisāmana; kala avāva̱na naomayarabingli ngarumda athumlila shimlui miya.

¹⁶Chiwui thili Jobna kum shākha hangmati ringvāda, anaomayara, naomayarawui naomayarabing, thot mati eina tangda thei.

¹⁷Kala Jobna kasāngkha okpeida rarlak eina thihaowa.