Read Tangkhul Naga JOB 5 Bible Online

JOB 5 - Tangkhul Naga bible

JOB 5

¹Arui vaolu, nali ngahānkāki kaji mi leila? Kathara kachipali nana ngakaora?

²Mangkhama̱ali malungkhavātna kachangkat sāthata, kala yuikashina samkasongali shaothata.

³Mangkhama̱na angayung sa̱kakhui I theihaira, kha kashuirak eina ina awui pamkhavaili khonshiya.

⁴Anao ngarābing ningtāphup kahaiwui eina katāvali lei, athum ngaveili sākazamhaowa, kala athumli kanshokmi khavai khipākha maleisamana.

⁵Awui heiun kathaiana zai, chila ka̱shātlungwui eina akakhuina, kala ra̱kachangana awui lanli honpama.

⁶Kaja sipkasā chifawui eina mashokmana, kala kakhanang ngaleiwui eina makharmana;

⁷kha meipāna jakkakā thāda mi hi khanang khavai pharai.

⁸Iwui vanga, I Vareli phātha̱ra, kala Vareli ina iwui kasak chitheithara;

⁹hakkhamahā kala phaningla makakhui ot, matakhak kahai ot mashānkharara kasāpā chili:

¹⁰okathuili ana kazing romi, kala luili tara̱ ngarung ngasaka,

¹¹khangazanabingli ana reingasaka; kala chapkhangachā athumli tāphup kahaipamli khāngkai.

¹² Ana ningngai makaphābingwui awor sākhayeimi, chithāda athumwui pāngna ungkashung khikha maleimara.

¹³Ana thangkhamabingli athumwui awor chili manngasaka, kala phākakhaningbingwui khangarān chi ngalāngda shimān ngasaka.

¹⁴Athumna ngashunshong tangkhamang samphanga kala ngashunung atamli ngayā thāda kajupzata.

¹⁵Kha ana avāva̱ makhaleibingli makaphā athumwui khamor eina huimi, kala pangshap khaleiyawui pāng eina khangazanabingli kanmi.

¹⁶Chithāda, makhamashungwui khamor kafamihaida khavātabingna kachihān samphanga.

¹⁷ “Yanglu, Varena hāngkhamathina mi chi kalā mahai; chiwui vang eina Sāshap-pangshapana hangkhamachinli machinalu.

¹⁸ Kaja ana khamā za̱ngasaka, kha ana rommi; ana shaoza̱lala apāng eina raingasaka.

¹⁹Kachot kachāng tharukwui eina ana nali huimira, kashineli makaphāna masāza̱mara.

²⁰Chām kharā tharan ana kathiwui eina; kala raili raighai pangshapwui eina ana kanmira.

²¹Malena khamashātwui eina nali thummihaira, kala shimān ngasak khavai kharā tharānlila nana mangacheemara.

²²Shiman khavai kala chāmrei atamli nana mana̱ra, kala okathuiwui sāyurlila mangacheemara.

²³Khikhalajila nana luili khalei lunggui saikorali longnao sāra, kala khararwui ramsābingna nali chingri eina ngayurra.

²⁴Nawui kachonshimli chingri eina kapam samphangra, kala nana nawui sha̱kei shānyangda kashimān maleimana kaji theira.

²⁵Kala nawui ara̱-azā kachungkhara kajila, kala nawui naothei okathuiwui khawoli ngayāra kajila nana theira.

²⁶Nana okpeishap okpeida, mātheina khamin eina lanpumli khuiunglaga ungngapokasang thāda chikhurli vāra.

²⁷Yanglu, ithumna phāyanghaira; hi khamashungna. Nganālu, kala nawui vang phākhavaina da theilu.”