Read Tangkhul Naga JOB 7 Bible Online

JOB 7 - Tangkhul Naga bible

JOB 7

¹Okathuili mina ot chotlak eina masāmala, kala awui mirin ngalang kaphei kathā maningmala?

²Raonaona khaya̱ ningkachāng thāda, kala ngalangkaphei mina awui ngalangman khangarai thāda,

³ili aremawui atam kachāng kachungkha mihaira, kala sipkasāwui ngayā kachungkha ili yartāmihaira.

⁴Ina pikazang tharan, I katharan ngakarthuinikhala da ina hānga. Kha ngayā sānglaka, kala kazing kathang eina tangda I ngareishok ngareizang sāpama.

⁵Iphasā ka̱lom eina chifana pemhaira; iwui ahui mararkokhaida ngarenkhai kala sānui shona.

⁶Iwui okthot rahwui kapemli thākmei, kala kachihān maleila kuphaowa.

⁷Phaningyanglu, iwui mirin khaksuikha kathāna; imikna khamathā matheiluimara.

⁸Ili katheiya mik china ili matheiluimara; namikna ili yangda leilakha I thuihaora.

⁹Muiyā vānmamānda shimān kahai chi tākam eina, Kathewui ramli zangkahaia a china mashokluimana;

¹⁰awui shimli malatungluimana, kala awui apamna ali matheiluimana.

¹¹“Chiwui vang eina ina ikhamorli makhāmmara; imanglāwui lungvāt eina ina matuiphalungra; ining kakhālungli maringkaphā phongshokra.

¹²I shamadrula, maningakha shamadruwui sārei da, nana iwuitungli khamayona phākasangla?

¹³Iwui petna ili ringphā ngasakra, iwui ngasām khavaina iwui maringkaphā vānngasakra, da ina kahāng tharan;

¹⁴nana ili mangchān eina sāmachita, kala khamahā eina ngachee ngasaka,

¹⁵chithāda ina ira̱kuimāng eina okthuiki kajile kahungli shimetmida kathi phāmei.

¹⁶Imirin sānhaira; okthuichingki kajila maning. Iningkhānhaoga, kaja iwui okthot khaksuikhana.

¹⁷ Mi hi khida, nana hiyākha sakta sākhui, kala nana ali hiyākha ningsangda,

¹⁸ngathor kachida akhayang, kala mikkhayip kachida ali chāng khayang?

¹⁹Iwui eina na karankha mangareithuifamarakhala, ina machora̱ mayuikatā eina tangda imangli horhairakhala?

²⁰Ina morei sāda china nali khi sāhao? mibingli ra̱khayanga! Ili khisāda nawui rinkhavai ngasā ngasakhao? I khisāda nawui vang otrei ngasāhaokhala?

²¹Khisāda nana iwui khangui mapheomithu, kala iwui khayon makhuithuimithu? Kaja ara I ngaleili pihaora, nana phāra, kha I maleisāmara.