Read Tangkhul Naga JOB 8 Bible Online

JOB 8 - Tangkhul Naga bible

JOB 8

¹Chiwui thili Shuhwui Bildadna ngahānkai:

²Hikatha tui nana karankha hāngfara, kala nakhamorwui tui kapanga masi thāda phanra?

³Varena mashun masho ngasakla? Maningakha Reikhamataia china mashunli makhui ngasakla?

⁴Nanao ngarāna awui mangāli morei sāhaiakha, ana athumwui khayonwui pangshapli horsangmihaira.

⁵Nana Vareli phāda kala Reikhamataiali poakha,

⁶nana thar-akha kala mashungakha, mashoila nawui vang ana ngakarthuida nali mashungrik kahai mirinwui sāman mira.

⁷Kala nawui haokaphok teosālala, naodava kachungkha ngasāhaora.

⁸Kaja, ngathingyanglu, thuikahai thotwui pongli, ina kapona; mirin kaphaningungyanglu, kala avāva̱ ngarāna phākashok chili chukmajalu;

⁹kaja ithuma ayāmang okathui kathāna, kala khikha matheithangmeimana, kaja ithumwui okthot hiya khaya̱ kathāna.

¹⁰Athumna nali matamchitheimarala, kala mahāngmarala, kala athumwui theikakhui tuibing chi mahāngmarala?

¹¹“Konana rapur makhaleili phorpaila? Titina tara̱ makhaleili kharpaila?

¹²Awon wonmahungda leilakha mata̱tteklala, tara̱ thengakha khawo khangateibingli china ngahuirihaowa.

¹³Vareli malai kahai saikorawui shongfa chithai; kala Vare makathei miwui kachihān shimānhaora.

¹⁴Awui ningkhalum ngakaithāmhaowa, kala awui ning horkasang kārkaopan kathāna.

¹⁵Ana awui shimli shaipama, kha china manganingrarmana; ana chi singtita, kha china makhāngrarmana.”

¹⁶Ana kazing masāranglakha mateka kala aphāngna yāmguili ngapānvai.

¹⁷Angayungna lungkhorli neikazamda ngapana, kala lunghārpamli phora.

¹⁸Awui apamwui eina shimān ngasakhaiakha, akhavāna mamayāmada hāngra, Ina nali matheilakmana.

¹⁹Yanglu, hi awui khamathān apongna, kala ngalei chiwui eina khangatei phorra.

²⁰“Yanglu, shāt makakā mili Varena makhalanhaimara, makaphā kasābingwui pāngla masingkhuimara.

²¹Ana nakhamorli khamana̱ chipemmira, namorchaili khamathānmira.

²²Nali ningkakachaibing chili kakhayakna chonvai sāngasakra, kala makaphābingwui kachonshim chi maleiluimara.”