Read Tangkhul Naga JOB 9 Bible Online

JOB 9 - Tangkhul Naga bible

JOB 9

¹ Chiwui thili Jobna ngahānkai:

²Kachangkhata chithai kaji ina thei: Kha Varewui mangāli mi khipa mashungshaprakhala?

³Kachikathāna Vareli ngayātngailala, thingkhawui alungli akhashidala mangahānkārarmara.

⁴Awui thangkhamei thuklaka, kala pangshapla reilaka, —khipā ning mararshāp eina ali ngakaishilaga ungkashung leihairakhala?—

⁵ana kaphungbing khangthui, kala athumna matheimana, awui malungkhavāt eina mashongachei khangasak tharan;

⁶okathuili awui apamwui eina ana khanukshoka, kala chiwui pākra̱bing chi nganuka;

⁷ana zimikli kasoi, kala mashok kachangmana; kala sirābing sāphinhai;

⁸amāngna kazingram hārshoka, kala shamadru khangaphaotungli naishāna;

⁹ Bear, Orion, Pleiades[1] kala azingshongwui masaikong kahai ana sai;

¹⁰phaningla makakhui kahaka ot ana sai, kala matakhak kahai ot mashānrarmana.

¹¹Yanglu, ana ili rāmakānlala, ina ali matheimana; ana zatvāmamāna, kha ina mayangkhuimana.

¹²Yanglu, ana ngapaithuihaira; ali khipāna khāmshapra? Nana khi kasākhala da khipāna ali hāngra?

¹³Varena awui malungkhavāt mangalanmara; Rahabli ngachonkhamebingla apheizingli khoruma.

¹⁴Chithākha ina kathāda ali ngahānkāra, kala khitui hākhuilaga hāngra?

¹⁵Ina kayākha tharlala ali khikha mangahānkārarmara, ili lumashan khavai kaphena chili poshukmara.

¹⁶Ina ali hokhuida ana ili ngahānkāmilala, iwui akhon ana shāmida leilida ina mashitsangrarmara.

¹⁷Kaja ana ili siphan zingrot eina khaningkachupa, kala angalang maleila iwui khamā chungsang ngasaka;

¹⁸ana ili khak masuikhui ngasakmana, kha kakhāmāng eina chipema.

¹⁹Yāngwui khanganurna jiakha ali yangmalu! kala mashunwui ponglina jiakha, ali khipāna kasirlengra?

²⁰Ina mashunglala, ikhalattawui khamorna ili yona jira; I shāt makālala, awui mangāle kāsara.

²¹I shāt makāmana, I khalatta machāpmimana; iwui mirinla sānhaira.

²²Saikora akhasera, chiwui vang eina ina kahāngna, shāt makakā, kala makaphā khaninili ana shimān ngasaka.

²³Ka̱lāshātna kashuirak eina kathi khuikharā tharan, khayon makhalei miwui unshimui chili ana mana̱rora.

²⁴Okathui hi makhayābingwui pāngli mihaira, ana chiwui bichar kasābingwui mai farormihaira; hi ana maningakha khipānakhala?

²⁵Iwui mirin shongzā khangakhuili thākmei, khamathā kaho matheila athum yongthuihaira.

²⁶Titiwui marikhong thāda huithui, khalāngna sāshaitungli hutsāda yongkhavā thai.

²⁷Iwui mamayākhangai chi malaihaora, iwui sikafa ningngai chihohaida ning mathānthuphaora, da hāngakha,

²⁸iwui kachotkachāng hiwui vang ngacheelaka, kaja ina thei ili khayon makhalei mina da nana makhuimara.

²⁹Ili yonngasakra; chithākha khisāda aremali hithāda khanangrakhala?

³⁰Ina horam eina ra̱vailala, ipāng lye eina maziklala,

³¹nana ili khorchopli horsanghaora, kala I khalattawui kashankachonala ili ningkachaira.

³²Kaja, a hi I thāda ngahānkākapai mi maningmana, kala bichar sārumkapaila maningmana.

³³Ini khanili pāng parda, iniwui ngachaili yangkhame maleimana.

³⁴Awui lijei iwui eina khuithuihaoranu, kala ali khangachee china ili machipā ngasakluiaranu.

³⁵Chieina ina ali khangachee maleila matuira; kaja I khalatta chi mathālengthuwa.