Read Tangkhul Naga LAA 102 Bible Online

LAA 102 - Tangkhul Naga bible

LAA 102

¹O PROHO, iwui seihā kasā nganāmilu, iwui khavao nawuili rāshungranu.

²Iwui kakhanang atamli namai iwui eina mangathumihaialu! Ili nganāmida ina kaho tharan zimiksho chili ngahānkāmilu.

³Kaja iwui atam meikhut thāda thuihaowa, kala ira̱kui sharkha̱ thāda chuiya.

⁴Ining khawo wutkahai thāda thenghaowa, zātla kazā malaihaowa.

⁵Panglak eina ringkhangāwui vang ara̱kuimāng ngasāhaira.

⁶Iva lamhāngli khalei khalāng sāshaia thāhaira, khararzingwui pawung thāhaira.

⁷I mapivāmana, iva shimtungli ngachakyāng eina kapam vānao thāhaira.

⁸Langpongda iwui yangkashebingna ili mana̱shi, ili mana̱kharor athumna khonshida iming singpama.

⁹Kaja ina hotla zāt thāda zai, chāra̱ ra̱shakli manāta,

¹⁰nana malungkangda malungkhavātwui vang; nana ili khāngkālaga horvāhaowa.

¹¹Iwui mirin zingyinlamwui khaya̱ kathāna; khawo thāda I thenghaowa.

¹²Kha PROHO, nava mashimānda wungpamkhongli pamchinga; naming mithot saikora leichinga.

¹³Nana ngakarthuida Zionli lukhamashan leimira; ali lumashanmirānhaira; langchin ungshunghaira.

¹⁴Kaja naraobingna awui ngalungli saklak eina khui, kala awui chifachihāli lumashana.

¹⁵PROHOwui mingli miyurbingna ngacheera, kala okathuiwui awunga saikorana nawui tekhamatei chili ngacheera.

¹⁶Kaja PROHOna Zion semkāra, ana awui tekhamatei eina rāra;

¹⁷khangazanabingwui seihā kasā ana khuisangmira, kala athumwui kapo chili maningkachaimara.

¹⁸Tui hi rāki kaji thotwui vang kapihailu; chieina mapharārang kaje mibingna PROHOli masot chikatpaira:

¹⁹kaja awui kathara kajuipam eina yangtāmi, kazingramwui eina okathuili PROHOna yangtāmi,

²⁰narkahaibingwui ringkhangā shāmi khavai, thihaoki kaje athumli chihomi khavaina;

²¹chithāda Zionli mina PROHOwui ming phongmi khavai, kala Jerusalemli ali masochikat khavaina,

²²mibing kala wungrambingna kazipta PROHOli khokharum tharan.

²³I nganuifalaga iwui yāng ana ngayāngmihaira, ana iwui mirin sha̱sang ngasakhaira.

²⁴Ina hānga, “O iwui Vare, iwui mirin angachāpatli makhuithuimihaialu, nawui zingkum thot thot leichinga.”

²⁵ Achālakhawui eina okathui khaning khavai nana sai, kala kazingrambingla napāngwui themsakna.

²⁶Athum shimānra, kha nava leichingra; athum saikora kashankachon thāda kakhaora. Kashankachon thāda nana ngacheimi, kala athum kānthuihaowa;

²⁷kha nava chichinga, kala nawui zingkum katang mavaimana.

²⁸Naraobingwui naongarābing tāphup eina pānra. nawui mangāli athumwui ara̱-azāli sakāmira.