Read Tangkhul Naga LAA 106 Bible Online

LAA 106 - Tangkhul Naga bible

LAA 106

¹ PROHOli solu! O PROHOli ningkashi milu, kaja a phālaka; awui makhangachei leikashi leichinga.

²PROHOna hakkhamahā sākahai chi khipāna hānglengrakhala, lah awui masot saikora chitheirarrakhala?

³Mashun khamayonabing sokhami ngasāra, atam kachida khamashung khangarong ot kasā athum chi!

⁴O PROHO, nawui mibingli ngahānkhangai chitheikhami tharan, ilila kaphaningungmilu; athumli nana kankashok tharan, ili khangachonmilu;

⁵chieina nana kapangkakhuibingwui mirin, mataikasang inala theira, chieina nawui miyurwui khamathān chili I ringphāra; chieina nawui shimluikat eina ina tekmateira.

⁶Ishāvā ngarāla, ithumla morei sāhaira; ithumna khangui ot sāhaira, ithumna makhayāwui ot sāhaira.

⁷ Ishāvā ngarā Egyptli leilakha nawui matakhak kahai ot mamachukkhuimana; nawui makhavāta makhangachei leikashi athumna maphaningungmana; kha Juikhamataiali Red Seali ngakaishi.

⁸Chithālala awui mingwui vang ana athumli huimi, chi eina ana awui sāshap pangshap chithei khavaina.

⁹ Ana Red Seali kahara, kala chi thenghaowa; kala ana ngalei kathengli kazat thāda athumli kathuka eina thānshoka.

¹⁰Chieina ana yangkashebingwui pāng eina athumli huimi, kala yangkashebingwui pangshap eina kankhui.

¹¹Kala athumwui yangkashebingli tara̱na ngaphum ngasakhaida, akhala mataimimana.

¹² Chieina athumna awui tui shitsanga; athumna awui masotlaa sai.

¹³Kha ngalāngda awui otsak athumna malaihaowa; awui hāngkachithei athumna mangaraithuwa.

¹⁴ Kha athumna lamhāngli sākhangaingai sāthuihaowa, kala siwukli Vareli tamyanga;

¹⁵athumna kapo chi ana mi, kha shimān khangasaka kazāt rāngasaka.

¹⁶ PROHOwui kathara Moses eina Aaronli athumna yuikashi tharan,

¹⁷ngaleina ngachakkhaida Dathanli mayuisanghaowa, kala Abiramlonglila ja̱rorserhaowa.

¹⁸Athumwui ngachaili meila chuishoka, makhayābingli meiwonna chuithathaowa.

¹⁹ Horebli athumna seinao sākhui, kala heikakhui ama̱li khoruma.

²⁰Varewui tekhamatei chi khawo kashaia seiwui ama̱ eina athumna ngatha̱haowa.

²¹Athumwui huikhame Vare, Egyptli hakkhamahā ot sāmi kahaiali malaihaowa;

²²Hamwui ngaleili matakhak kahai ot, kala Red Seali khangachee-khangachā ot sakhame chili.

²³Chiwui vang ana athumli shimān ngasakra da hānga— kha ana kapangkakhui Mosesna awui mangāli nganingkhamida, athumli sāshimānki kaji awui malungkhavāt makhuithui ngasaksasi kaje athum shimānra.

²⁴ Chiwui thili awui ngashit kahaili shitkasang maleithuda, ringkaphā ngalei chili yangkharinghaowa.

²⁵Athumwui kachonshimli kapumpama, kala PROHOwui akhon manganāthuwa.

²⁶Chiwui vang apāng khāngkālaga, athumli khangashit sai, kaja ana athumli lamhāngli thisang ngasakra,

²⁷ kala yurbingwui alungli athumwui ara̱-azā ngalei saikorali chaiyānghaora.

²⁸ Chieina athumna Peorwui Baalli vāngaruma, kala katheli kapha̱ sā shaiya;

²⁹athumwui otsak eina PROHOli malungvātngasaka, chieina athumwui alungli kazātkashi shokngasaka.

³⁰Phinehasna thuihāngkhami eina kazāt chi phāhainaowa.

³¹Chithāhaoda ali khamashung khangaronga da thot kachida shānkhuichinga.

³² Meribahwui tara̱pamli athumna ali malungvātngasaka; athumwui vang Mosesli makaphā phena;

³³kaja awui ning khāngasakhaowa, kala ana sākashi tui matui.

³⁴ PROHOna kakaso thāda athumna mibing chili mashaothatmana,

³⁵kha athumna yur kateili ngasoda athumwui kasāsā sha̱khui.

³⁶Athumna athumwui meoma̱li sheba sai, china athumwui vang khalen sathuihaowa.

³⁷ Athumna kameobingli athumwui naomayara ngarā, kala naongalāva̱ ngarā pha̱phayai;

³⁸ athumna khayon makhaleili ashee tāngasaka; athumwui naomayara kala naongalāva̱ ngarāwui ashee, Canaanwui meoma̱li pha̱phayāda; ngalei chi ashee eina makhao ngasaka.

³⁹Chithāda sāda athumwui otsak eina athum makathar ngasāhaowa, kala athumwui otsak khayorva̱̱wui otsak sāthuihaowa.

⁴⁰ Chiwui vang PROHOwui malungkhavāt awui mibingwuitungli tāhaowa, kala ana awui shimluili ningkachaihaowa;

⁴¹ana athumli miyurbingwui pāngli mihaowa, chithāda sāda athumli yangkakharingbingna athumwuitungli munga.

⁴²Athumwui yangkashebingna rekhareka; kala athumwui pangshapwui azingli haihaowa.

⁴³Kachungkha shida ana athumli kanshoka, kha ngakaikashi ot sāchinghaowa, chieina athumwui khayonwui vang maishi ngasaka.

⁴⁴Chithālala ana athumwui khangakao shākhami tharan, athumwui ringshāt chi ana theimi.

⁴⁵Athumwui vang awui tuingashit chi phaningungda, awui makhangachei leikashi athishurda awui ning nemtā ngasaka.

⁴⁶Athumli tukkhanarbingna lumashanmi khavai ana sāmi.

⁴⁷ Ithumli kahuimilu, O PROHO ithumwui Vare, kala miyurbingwui eina nana kazipkhuimilu, chithāda nawui katharamingli ithumna ningkashi mira kala masot khamili tekmatei ngasakra.

⁴⁸Israelwui Vare PROHOli sochikatranu! katang makhavaiwui eina katang mavaila! Kala mi saikorana “Amen” da hangranu!