Read Tangkhul Naga LAA 107 Bible Online

LAA 107 - Tangkhul Naga bible

LAA 107

¹ O PROHOli ningkashi milu, kaja a phālaka; kaja awui makhangachei leikashi chichinga!

²PROHOna ngatangkhui kahaibingna hāngranu, kachotwui eina ngatangkhui kahaibing

³kala apam saikorawui eina hokhui kahaibing, zingshoshongwui eina kala zingtunshong eina, atungshongwui eina kala azingshongwui eina.

⁴Kaikhana siwuk khamasaili zata, keinungli pamkhavai apong masamphangthuda;

⁵thaihao kala ra̱changhaoda, athumwui wuklungli manglā vānhaowa.

⁶Chieina athumwui kakhananglungli athumna PROHOli ngakaowa, kala ana athumli ringshātwui eina kanshokmi;

⁷athumna pānkhavai keinung maungshungchaoranglakha, ana khangatar shongfa akha eina thānmi.

⁸Awui makhangachei leikashiwui vang athumna PROHOli ningshiranu, miwui naomayarabingli matakhak kahai ot sākhamiwui vang.

⁹Kaja ana ra̱kachangli chirmi, kala kathaili khamathā kashakazā eina thongasaka.

¹⁰Kaikhana tangkhamang kala ngamirut kahaili pama, mari eina khalaplaga tuknar kahaia kakhanangabing,

¹¹kaja athumna PROHOwui tuili mamayāla ngakaishihaowa, kala Juikhamataiawui hāngkachithei makhuisangmana.

¹²Ot kasā chotnāhaoda athumwui ning chothaowa; athumna kongluisangda khipānakha mangachonmimana.

¹³Chieina athumwui kakhanang eina PROHOli ngakaowa, kala ana athumwui ringshāt eina kanshokmi;

¹⁴ana athumli tangkhamangwui eina khuishokmi, kala athumli narkahai eina khalāmi.

¹⁵Awui makhangachei leikashiwui vang athumna PROHOli ningshiranu, miwui naomayarabingwui vang ana matakhak kahai ot sākhamiwui vang!

¹⁶Kaja ana pithraiwui khāmong sakhaimi, kala mari phākashut ahun khani sāngasaka.

¹⁷Athum kaikhana moreiwui vang kazai, kala athumwui khayonkhamāngwui vang kachot samphanga;

¹⁸athumna kashakazā saikora ningkachaiya, kala athumna kathi ngaveili vānganaiya.

¹⁹Chieina athumna kakhanang alungli PROHOli ngakaowa, kala ringshātwui eina ana athumli kanshokmi;

²⁰ana awui tui chihovāda athumli raimi; kala shimānki kajiwui eina athumli kanshokmi.

²¹Awui makhangachei leikashiwui vang athumna PROHOli ningshiranu, ana mibingli matakhak kahai ot sākhamiwui vang!

²²Kala athumna ningkashiwui pha̱kaphayā chigatranu, kala ana sākhami chiwui vang khamathān laa eina soranu.

²³Kaikhana jahas tongda ngayili vai, shamadrutungli leihkhalon ot sai;

²⁴athumna kathukali PROHOwui matakhak kahai, sākahai chi thei,

²⁵kaja ana kasoda siphan zingrot ngaphaokai, china shamadruwui tara̱ kaphekai.

²⁶Athumna kazingramli juikai, kala kathukali zangshunga; athumwui kaping athumwui makaphā alungli shimānhaowa;

²⁷Athumna khamaripnao thāda yuichachang zata, athumwui thangkhamei vātanghaowa.

²⁸Chiwui thili athum kakhananglungli PROHOli ngakaowa, kala athumli ringshātwui eina ana kanshokmi;

²⁹ana siphan zingrotli va̱rihai ngasaka, kala shamadruwui ra̱phaola kasaikha vānhaowa.

³⁰Chieina athumna ringphai, khikhalajila athum va̱rihaowa, kala ana athumwui ningkachāng ngasām khavaipamli thānungmi.

³¹Awui makhangachei leikashiwui vang athumna PROHOli ningshiranu, ana miwui naomayarabingli matakhak kahai ot sākhamiwui vang!

³²Yarui kazipli ali soserranu, kala khararnaobingwui kazipli ali masot chikatranu.

³³Ana kongla siwuk onngasaka, ura̱pamla ngalei katheng onngasaka,

³⁴ngalei katumpam masāvaikapai khamararpam onngasaka, apam chili kapambingwui makaphāwui vangna.

³⁵Ana siwuk ra̱khong onngasaka, thengkhamareng lam ura̱ wokngasaka.

³⁶Kala ana chili kathaibingli okthui ngasaka, kala athumna pamkhavai keinung sakai;

³⁷athumna athei-arai linga, drakhāthei lingsanga, kala athei kachungkha mathei.

³⁸Awui sokhami eina athum kachungkha mataisanga; kala ana athumwui sha̱keila masuitā ngasakmana.

³⁹Rekakharek, kakhanang, kachot, ringkashi eina athum suitā kahai tharan,

⁴⁰ana wungnaobingli khayāmashi ngasakmana kala athumli shongfa makhalei lamhāngli yaozat ngasaka;

⁴¹kha khavātabingli ana kachotwui eina khāngkhuimi, kala yao ashangva̱ thāda ana shimkhurli mayāmi.

⁴²Mashungrik kahaibingna chi theida mathāna; kala makaphā makhayā saikorana khamor kafakhamhaowa.

⁴³Thangkhamabing, hāngda khalei hi theikhuiranu; PROHOwui makhangachei leikashi mibingna chukmajakhuiranu.