Read Tangkhul Naga LAA 118 Bible Online

LAA 118 - Tangkhul Naga bible

LAA 118

¹ PROHOli ningshilu, kaja a phālaka; awui makhangachei leikashi katang mavaimana!

²Israelna, “Awui makhangachei leikashi katang mavaimana” da hangranu.

³Aaronwui shimkhurna, “Awui makhangachei leikashi katang mavaimana” da hangranu.

⁴PROHOli khangachee saikorana, “Awui makhangachei leikashi katang mavaimana” da hangranu.

⁵Ina kakhanang tharan PROHOli ngakaowa; PROHOna ili ngahānkāmi, kala ili ningkhān ngasaka.

⁶ PROHOna ili nganaimilakha ina mangacheemara. Mina ili khi sathukrakhala?

⁷Ili ngachonmi khavai PROHOna iwui shong leidalei; ili yangkashebingli mathānda ina yangra.

⁸Mili chihanki kajiwui vanga, PROHOli ngayinkakhuina phāmei.

⁹Wungnaobingli chihanki kajiwui vanga PROHOli ngayinkakhuina phāmei.

¹⁰Yur saikorana ili kuinama; PROHOwui mingli ina athumli yuiya!

¹¹Athumna ili kuinama, ari arāp kuimareida athumna ili kuinama, PROHOwui mingli Ina athumli yuiya.

¹²Athumna ili khui thāda kuinama, athumna ka̱shat kachui thāda chui; PROHOwui mingli ina athumli yuiya.

¹³Ili yāng eina rāsha̱da I kongluinaikhaya, kha PROHOna ili ngachonmi.

¹⁴ PROHO iwui pangshap kala iwui laana; a iwui huikhame ngasāhaira.

¹⁵Khamashungabingwui kachonshimli khayuiwui khamathān laa kasā nganālu; “PROHOwui yāpāngna rai yuimihaira,

¹⁶PROHOwui yāpāngli masot miya; PROHOwui yāpāngna pinglak eina sāmihaira!”

¹⁷I mathimara, kha I ringra, kala PROHOna sāmi kahai hāngchitheira.

¹⁸PROHOna ili chotchānglak eina hāngmachina, kha ana ili kathiva mathi ngasakmana.

¹⁹Ili khamashung khangarongwui ngaveibing shomilu, ina chieina zangda PROHOli ningkashi mira.

²⁰Hi PROHOwui ngaveina; khamashung khangarongabingna chieina zangra.

²¹Ili ngahānkāmida iwui huikhame ngasā kahaiwui vang nali ningshi.

²² Shim kasābingna khalan kahai lunggui chi, achikunwui akhoka pākra̱ ngasāhaira.

²³Hi PROHOna kasāna, ithumwui mikyanli matakhakhai.

²⁴PROHOna sāmi kahai zimiksho chi ajana; ithumna chili ringphāda mathānsa.

²⁵ O PROHO, ithumli kanmi khavai ithumna nali poli! O PROHO, ithumna nali poli! ithumli maikhayā milu!

²⁶ PROHOwui mingli kharā mi sokhami ngasāranu! ithumna PROHOwui shim eina nathumli somi.

²⁷PROHO hi Varivarana, kala ana ithumli kahor mihaira. Hanphutwui angaji pam vāshungda, ringkaphāwui thingphāng singvālu.

²⁸Na iwui Varena, kala ina nali ningkashi mira; na iwui Varena, ina nali sochikatra.

²⁹O PROHOli ningkashi milu, kaja a kaphaana, kaja awui makhangachei leikashi katang mavaimana!