Read Tangkhul Naga LAA 119 Bible Online

LAA 119 - Tangkhul Naga bible

LAA 119

¹PROHOwui ainli kazatabing, shātmakakā athum chi sokhamina,

²Awui ningkhamili kashurabing; ali ningtongda kaphābing sokhamina,

³khangui otla masāla, kha awui shongfali kazata chi.

⁴Nawui hāngkachithei chi ningsanglak eina mayon khavai hāngmihaira.

⁵O nawui shiyan khamayonli iwui apong mangacheilaksi kaje jong!

⁶Chieina nawui ningkhami saikorali yangchingda, Ili kakhayak masamphang ngasakmara.

⁷Ina nali ngarongrik kahai wuklung eina masot mira, nawui khamashung shiyanbing tamkhui kahai tharan.

⁸Ina nawui ain mayonra; O ili horchao kahai masamialu!

⁹Yaronlakha kathāda awui apong tharda hairakhala? Nawui tui athishurda khamayon einana.

¹⁰Ina ningtongda nali phai; nawui ningkhamibingwui eina ili mama̱thui ngasakmialu!

¹¹Ina nawui tui iningli shāptithaira, chithāda ina nali morei masāmara.

¹²O PROHO, nali soranu; ili nawui ain tamchitheimilu.

¹³Nakhamorwui shiyan saikora imorchai eina ina phongshokra.

¹⁴Kashāng-kharei chiyākha thāda nawui ningkhamiwui apongli ina mathāna.

¹⁵Nawui hāngkachitheili ina machukra, kala nawui apongli ina yangchingra.

¹⁶Nawui ainli ina ringphāra, nawui tui ina mamalaimara.

¹⁷Naraoli mavātlakla sāmilu, chithāda sāda ina okthuida nawui tui mayonra.

¹⁸Imik rakngasakmilu, chieina ina nawui ainwui eina matakhak kahai otbing theipaira.

¹⁹Iva okathuili kha̱ramkazat mina; nawui ningkhami iwui eina mathummihaialu.

²⁰Atam kachida nawui shiyanbing theikhangaiwui vang ining thenghaira.

²¹Nawui ningkhamibingwui eina ma̱thui kahaia, achei makathei, khonshi kahaia chili nana kharara;

²²athumwui khamashāt kala mana̱kashi iwui eina khuithuimihaolu, kaja ina nawui tui mayona.

²³Wungnaobingna ili ngathumda ngarānlala, naraona nawui shiyan mayonchingra.

²⁴Nawui tui iwui ringkaphāna, chi iwui hāngmachinkhamena.

²⁵Imanglā chifali pizanghaira, nawui tui athishurda ili mathuk ngasakmilu!

²⁶Iwui apong kahāng tharan nana ili ngahānkāmi, nawui ain ili tamchitheimilu.

²⁷Nawui tamkachitheiwui apongli ili theishingkhui ngasakmilu, kala nawui matakhak kahai otli ina machukra.

²⁸Kakhanangwui vang imanglā yurhaira, nawui tui athishurda ili pangngasakmilu.

²⁹khangui apong iwui eina katāva̱li haimilu, kala lumashanmida nawui ain tamchitheimilu!

³⁰Ina ningkatongwui apong hākhuihaira, Ina nawui shiyanbing imangāli hai.

³¹O PROHO, nawui hāngkahai chi ina shurchinga ili makhayak ngasakalu.

³²Nawui ningkhami athishurda Ina ngasamzatra, iwui theikakhui nana mataisangkhami tharan.

³³Nawui ainwui apong ili tamchitheimilu, O PROHO; kala khanao eina tangda ina mayonra.

³⁴Theishingkakhui chi ili milu, chieina ina nawui ningkhami mayonra, kala ining tongda mayonra.

³⁵Nawui ningkhamiwui shongfali ili thānmilu, kaja ina chili ningyāng unglaka.

³⁶Nawui hāngkachitheili ining ngareiung ngasakmilu, tongkazā maphāthui ngasakhaialu.

³⁷Makānkhanā otwui eina imik ngareithuihailaga nawui apongli ili okthui ngasakmilu.

³⁸Nali makhangacheebingli ngashit kahai chi, naraoli ungshungmilu.

³⁹Ina khangachee malungkhavāt chi iwui eina khuithuimihaolu; kaja nawui shiyan phālaka.

⁴⁰Yanglu, ina nawui chitheikhami chi ningchānga; nawui khamashung khangarong chiwui alungli ili okthui ngasakmilu.

⁴¹Nawui makhangachei leikashi ili tāshungmilu, O PROHO, nawui khangashit athishurda nawui huikhami chi;

⁴²chithāda ili kazeibing chili ngahānkā khavai leisāra, kaja ina nawui tui chili shitsanga.

⁴³Khamashung tui chi ikhamorwui eina khuithuichao majimihaialu; kaja iwui kachihān nawui shiyanbingli lei.

⁴⁴Ina katang mavaila nawui ain mayonchingra;

⁴⁵kaja nawui chitheikhami ina khamayonwui vang, ina ningkhān eina yaothuizatra,

⁴⁶awungabingwui mangāli ina nawui ningkhamila matuira, kala mai mashi ngasakmara;

⁴⁷kaja nawui ningkhamili ina leishida khamathān samphanga.

⁴⁸Ina leikashiya nawui ningkhamili ina khayāshiya, kala ina nawui shiyan athishurda machukra.

⁴⁹Narao ili chihān khangasaka nawui tui chi ili phaningung ngasakmilu

⁵⁰Iwui kakhanang atamli nawui tuingashitna ili okthui ngasaka kaji hina ning lumngasaka.

⁵¹Vare makatheibingna ili zakshilak eina zeiya, kha ina nawui ain eina mangareithuimana.

⁵²Nawui achālakhawui shiyanbing ina phaningkhaung tharan, O PROHO, ina ningluma.

⁵³Nawui ain makhamayonwui vang, malungkhavātna pema.

⁵⁴Ina manglārin kazat shimli nawui ainna iwui laa sai.

⁵⁵O PROHO, ina ngayā naming phaningpiya, kala nawui ain mayona.

⁵⁶Nawui hāngkachithei ina mayonhaoda, sokhami hi ili tākashungna.

⁵⁷PROHO chi iwui yarna; nawui tui mayonra da ina ngashithaira.

⁵⁸Ining tongda nawui ngahānkhangai kapona; nawui ngashit kahai athishurda ili khalumashanmilu.

⁵⁹Ina nawui apongli chukkhamaja̱ tharan, nawui hāngkahai chili zata.

⁶⁰Ina nawui ningkhami mayonkida, kapan maleilakmana.

⁶¹Makhayābingwui khara̱na ili khalen sanglala, Ina nawui ain mamalaimana.

⁶²Nawui khamashung ainbingwui vang, ngayā thuimathukta ina nali masochikata.

⁶³Nawui chitheikhami khamayonabing, nali khangachee saikora iwui khavāknaona.

⁶⁴O PROHO, okathuila, nawui makhangachei leikashina pemtinghai; nawui shiyan ili tamchitheimilu!

⁶⁵Nawui kahāng athishurda, O PROHO, naraoli mathalāk eina sāmihaira.

⁶⁶Kaphā bichar, theishingkakhui ili tamchitheimilu; kaja ina nawui ningkhamili shitsanga.

⁶⁷Kakhanang masamphangranglakha, ina zatkhangaili zatsai; kha ara ina nawui tui mayona.

⁶⁸Na kaphaana, kaphā ot sai; nawui ain ili tamchitheimilu.

⁶⁹Mashitkasangbingna ili kakapik phena; kha ining tongda ina nawui chitheikhami mayona;

⁷⁰athumwui ning athao thāda sānlaka, kha iya nawui ainli ringphālaka.

⁷¹Ina nawui shiyan tamkhui khavai khanang khangasak chi phālaka.

⁷²Sinā kala lupāsā thingthingle, nakhamor eina khami ainna iwui vang phāmei.

⁷³Napāng eina ili sākhuida semihaira, nawui ningkhami chi tamkhui khavai theishingkakhui ning ili milu.

⁷⁴Nali khangacheebingna ili kathei eina mathānra, khikhalajila ina nawui tuili chihāna.

⁷⁵O PROHO, nawui bichar mashunga da ina thei; kala nawui ningkatong alungli ili nana chotkhangasakna.

⁷⁶Nawui makhangachei leikashi china naraoli ninglum khavai ngaranmilu; naraoli nawui ngashit kahai athishurda.

⁷⁷Ina ringkhavai nawui lukhamashan kharāza̱milu; kaja nawui ain iwui khamathānna.

⁷⁸Mashitkasangbingli maishi ngasaklu, khikhalajila athumna ili nguingasaka; iwui vanga, nawui chitheikhamili ina machukpamra.

⁷⁹Nali khangacheebingna ili rāranu, chithāda athumna nawui hāngkahai theikhuira,

⁸⁰Ina maikashi masamphang khavai, nawui shiyanwui pongli, iningli shāt makāngasakalu.

⁸¹Nawui huikhami kahonna imanglā vānhaira, nawui tuili ina chihantitli.

⁸²Nawui ngashit kahai chili yangda imik ngazanhaira; “Nana katharan ili ninglum ngasakrakhala” da ina ngahāna.

⁸³Kaja I chāngpongli sharkahai drakhāra̱ sangkhavai khao thāhaira, chitha-ilala nawui shiyan ina mamalailakmana.

⁸⁴Naraona karankha khāngfarakhala? Ili rekakharekbingli katharan nana bichar sārakhala?

⁸⁵Mashitkasang mibingna iwui vang chom chuihaira, nawui ain makashurbingna.

⁸⁶Nawui ningkhami saikora makahatlakmana; minamda athumna ili rekhareka; ili khangachonmilu!

⁸⁷Okathuili athumna ili thitchang khavai sai; kha ina nawui chitheikhami mamalailakmana.

⁸⁸Nawui makhangachei leikashi alungli imanglā kahuimilu, chieina nakhamorwui ningkhami ina mayonpaira.

⁸⁹O PROHO, nawui tui kazingramli ngaziplak eina katang mavaila leichingra.

⁹⁰Thot saikorali nawui ningkatong mangacheimana; okathui nana sākahaina, kala chi leichinga.

⁹¹Nana sākahai athishurda, aja eina tangda lei, kaja ot saikora nawui raosera.

⁹²Nawui ainli ina mamathānsi kaja, ina kakhananglungli thihaira̱ra.

⁹³Nawui tamkachithei ina mamalailakmara, kaja chieina nana ili ringkhangasakna.

⁹⁴I nawuina, kahuimilu; kaja ina nawui tamkachithei phai.

⁹⁵Makhayāna ili shimān khavai rimpama, kha iva nawui mashun tui phaningchinga.

⁹⁶Kākashung kaho hi angaret leiserada ina theikhui, kha nawui ningkhami mashālāka.

⁹⁷Iyavo, nawui ainli leikashi! Langpongda ina chiwui pongli machuka.

⁹⁸Nawui ningkhamina ngasomichingda iwui yangkashebingli I thangmeimei.

⁹⁹Nawui tamkachitheili ina machukpamhaoda, ili chishutkhamebing saikorali ina theimei.

¹⁰⁰Nawui ningkhami khamayonwui vang, khararnaobinglila I theimei.

¹⁰¹Nawui tui mayon khavai, makaphā shongfali iphei makārsangmana.

¹⁰²Nawui shiyanbingwui eina ina mangareithuimana, kaja nana ili tamchithei.

¹⁰³Ina mazapkhayangli nawui tui kayākha shim, khuira̱li lāngda shimmei!

¹⁰⁴Nawui ningkhami mangā eina, ina theithangkhamei samphanga; chieina makhamashung apong saikorali ina yangkharinga.

¹⁰⁵Nawui tui ipheiwui thaomei na, iwui shongfawui kahorna.

¹⁰⁶Nawui khamashung shiyanbing mayon khavai, ina khangashit sāda chi mayāhaira.

¹⁰⁷I khanangnāhaira; O PROHO, nawui tuiwui athishurda ili ringngasakmilu!

¹⁰⁸O PROHO, iwui masokachikat khuimilu, kala nawui shiyanbing tamchitheimilu.

¹⁰⁹Iwui mirin ipāngli haichinga, kha ina nawui ain mamalailakmana.

¹¹⁰Makaphā-makhayāna ili khalen sanga, kha nawui kakasowui eina ina mayāmlakmana.

¹¹¹Nawui ningkhami mashimānda iwui shimluina; mha, chi ining mathān khavaina.

¹¹²Nawui shiyan khanao eina tangda mayon khavai iningli haimilu.

¹¹³Ning khani kasā mibingli ina yangkharinga, kha nawui ainli ina leishi.

¹¹⁴Na iwui ngayin khavaina kala chāngveina, ina nawui tuili chihāna.

¹¹⁵Makaphā kasābing, iwui eina thuihaolu, chithākha Varewui ningkhami ina mayonpaira,

¹¹⁶Ina ringkhavai nawui ngashit kahai athishurda singmilu, kala iwui kachihān chiwui vang makhayak ngasakmialu.

¹¹⁷Ili hapkakhano malei khavai mayonmilu, kala katang mavaila nawui shiyanli yangmilu!

¹¹⁸Nawui shiyanwui eina ma̱thui kahai athum saikorali nana khalanhai; mha, athumwui theithangkhamei aremana.

¹¹⁹Okathuiwui makaphā saikorali nana maripai thāda khui; chiwui vang ina nawui tamkachitheili leishiya.

¹²⁰Nali khangacheena iphasā kathira, kala nawui bicharli ina ngacheeya.

¹²¹Ina mashun kala khangarong khikhala kaji sai, ili rekakharekbingwui pāngli mahorsangmihaialu.

¹²²Kaphā sāmirada naraoli ngashitmilu; mashitkasangabingna ili marekharek ngasakalu.

¹²³Nawui huikhamiwui vang ngashānkapam imik ngazanhaira, kala nawui khamashunga tuingashit ungkashungwui vang.

¹²⁴Nawui makhangachei leikashi athishurda naraoli khayangmilu, kala ili nawui shiyan tamchitheimilu.

¹²⁵I nawui raona; theishingkakhui ili milu; chieina ina nawui tamkachithei theikhuipaira.

¹²⁶PROHOna saki kaji atamna, kaja nawui ain sākhaihaira.

¹²⁷Chiwui vang sināli, sinā kachangali lāngmeida ina nawui ningkhamili leishi.

¹²⁸Chiwui vang iwui pheikār kachida nawui tamkachithei athishurda zata; makhamashung apong saikora ina yangkharinga.

¹²⁹Nawui tamkachithei matakhakhai; chiwui vang eina imanglāna chi mayona.

¹³⁰Nawui tui khalākashokna kahor mi; ningkashambingli theikhui ngasaka.

¹³¹Ikhamor makāda honpama, kaja ina nawui ningkhami ningchānga.

¹³²Yangmida ili khalumashanmilu, namingli leikashibingli sāmikhangai thāda.

¹³³Nawui ngashit kahai athishurda iwui pheikār mayonmilu; khayonkhamāngna ili mayuiaranu.

¹³⁴Nawui tamkachithei mayonpai khavai, rekakharekwui eina ili kanmilu.

¹³⁵Naraowuitungli nawui kahor tāshungmilu, kala ili nawui shiyan tamchitheimilu.

¹³⁶Imikna chāra̱ kong thāda longa, khikhalajila mibingna nawui ain mamayonmana.

¹³⁷O PROHO! Nava khamashungana, kala nawui bichar khamashungana.

¹³⁸Khamashung khangarong kala ningkatongwui lungli nana nawui ningkhami haimihaira.

¹³⁹Iningli iwui malungkhavāt mei thāda chuihaira, khikhalajila iwui yangkashebingna nawui tui malaihaowa.

¹⁴⁰Nawui tuingashit kayākha mashungkhala; kala naraona chi leishiya.

¹⁴¹Chinkhamahaiya kateowa mina jilala, nawui tamkachithei mamalailakmana.

¹⁴²Nawui khamashung khangarong chichinga, kala nawui ain khamashungana.

¹⁴³Kakhanang ningkachot ili rāza̱haira, kha nawui ningkhami chi iwui ringkaphāna.

¹⁴⁴Nawui tamkachithei mashungchingra, I ringkhavai theishingkakhui milu.

¹⁴⁵Wuklung tongtingda ina ngakaoli; khangahānkāmilu! O PROHO! Nawui shiyan ina mayonra.

¹⁴⁶Ina nali vaoli; ili kahuimilu; chieina ina nawui tamkachithei mayonra.

¹⁴⁷Kazing mathangranglakha ina ngakarthuida ngachonmi khavai ngakaowa; ina nawui tuili chihāna.

¹⁴⁸Nawui ngashitmi kahai chili machuk khavai ngayā pongda imik rakpama.

¹⁴⁹Nawui makhangachei leikashi alungli iwui khon kashāmilu; O PROHO, nawui mashun alungli imanglā haimilu.

¹⁵⁰Makaphā ningngai eina rekakharekbingna ili rānganaiya; athum nawui ainwui eina tālaka.

¹⁵¹Kha O PROHO, nana nganaimi; kala nawui ningkhami saikora mashunga.

¹⁵²Nawui tamkachithei eina ina acha theihairasai chiya nana katang mavaila phāshok kahaina da.

¹⁵³Iwui kakhanang hi yangmida kakanshokmilu, kaja nawui ain ina mamalaimana.

¹⁵⁴iwui vang nganingmida huimilu; nawui ngashit kahai athishurda ili ringngasakmilu.

¹⁵⁵Makhayābingwui vang huikhami katāvali lei; kaja athumna nawui shiyan maphāmana.

¹⁵⁶O PROHO, nawui lukhamashan hakmahālaka; nawui mashun athishurda ili ringngasakmilu.

¹⁵⁷Ili rekakharek kala yangkashe kachungkhana; kha ina nawui tamkachithei eina mangacheilakmana.

¹⁵⁸Shitkasang makhaleibingli ina ningkachailak eina yanga, khikhalajila athumna nawui ningkhami mamayonmana.

¹⁵⁹Ina nawui tamkachitheili kayākha leishikhala phaningmilu! Nawui makhangachei leikashi thishurda ili okthui ngasakmilu.

¹⁶⁰Nawui tui khamashungna, kala nawui khamashunga shiyanbing mashimānda leichinga.

¹⁶¹Maram maleila wungnaobingna ili rekhareka; kha iningna nawui tuili khayāshiya.

¹⁶²Kahaka ngaponkakhui samkaphang thāda, ina nawui tuili mathānlaka.

¹⁶³Mikhanamli ina yangkharinga kala ningkachaiya, kha nawui ningkhamili ina leishi.

¹⁶⁴Nawui khamashung shiyanbingwui vang, thangkhali ina shinishida masochikata.

¹⁶⁵Nawui ainli leikashibing hakkhamahā chingri kahai lei; khikhana athumli phei mangaphok ngasakrarmara.

¹⁶⁶O PROHO, ina nawui huikhamili chihāna, kala ina nawui ningkhami chi sai.

¹⁶⁷Imanglāna nawui ningkhami mayona, ina leishi kachangkhata.

¹⁶⁸Nawui tamkachithei kala ningkhami ina mayona; kaja iwui apong saikora nawui mangāli lei.

¹⁶⁹O PROHO, iwui kapo nawui ngalemli kāshungranu; nawui tuiwui athishurda ili theishingkakhui milu.

¹⁷⁰Iwui kapo nawui mangāli kāshungranu; nawui tuiwui athishurda ili kanshokmilu.

¹⁷¹Nawui shiyan ili tamchithei khavaiwui vang, imorchaina masochikatra.

¹⁷²Ningkhami saikora khamashungwui vang imalena nawui tuingashit apongli laa sāra.

¹⁷³Ili ngachonmi khavai napāng ngarānmilu, kaja ina nawui tamkachithei kapangkhuihaira.

¹⁷⁴O PROHO, nawui huikhami chili ina ngaraili; kala nawui ain iwui ringkaphāna.

¹⁷⁵Nali masot mikhavai, ili ringngasakmilu; kala nawui shiyanbingna ili ngachonmiranu.

¹⁷⁶Shiman kahai yao thāda I ma̱zatli, naraoli kaphākhuimilu; kaja ina nawui ningkhami mamalailakmana.