Read Tangkhul Naga LAA 143 Bible Online

LAA 143 - Tangkhul Naga bible

LAA 143

¹O PROHO, iwui seihā kasā kashāmilu; iwui kapo khuisangmilu! Ningtongda nawui khangaronglungli ili khangahānkāmilu.

² Naraoli bichar masāmialu; kaja nawui mangāli khamashung eina kharing mi maleimana.

³Kaja yangkashena ili kharomhaira; imirin ana ngaleili sākachupmihaira; achā thikahai thāda ana ili tangkhamangli pamngasaka.

⁴Chiwui vang imanglā vānhaira, iwuklungli ngacheekhaihaowa.

⁵Achālakhawui atam ina phaningunga, nana sāmi kahai saikora ina machuka; Napāngna sāmi kahai ina phaningkachunga.

⁶Ipāng katingda poli; imanglāna ngalei katheng thāda nali ra̱changa.

⁷Kathakta ili khangahānkāmilu O PROHO! Imanglā vānhaira! Iwui eina namai mathummihaialu, maningakha ila chomli khavābing thāhaipaishina.

⁸Nawui makhangachei leikashi ngathorshong ili shāngasakmilu, kaja ina nali shitsanga. Ina zatki kaji apong chi ili tamchitheimilu; kaja nali imanglāna yangkakāna.

⁹O PROHO, ili yangkashebingwui eina kanshokmilu! Ngayinkhui khavai ina nali yāmkharāna.

¹⁰Nawui ningkachāng sākhavai tamchitheimilu; kaja na iwui Varena! Nawui kaphā manglā china, shongfali ashātli thānzatmilu.

¹¹Namingwui vang, O PROHO, imanglā phārimilu! Nawui khamashung khangarong alungli ili kakhanangwui eina khuishokmilu!

¹²Kala nawui makhangachei leikashilungli iwui yangkashebingli katattāmihaolu, kala iwui yangkashebing saikora sāshimānmihaolu; kaja I nawui raona.