Read Tangkhul Naga LAA 144 Bible Online

LAA 144 - Tangkhul Naga bible

LAA 144

¹Sochikatlu, PROHO iwui lunghārli, raiwui vang ipāng, ngarar khavaiwui ipāngmareng tamkachitheia;

²Iwui ngayin khavai lunghār kala iwui raipan, kankhame iwui chāngvei, ali ina ngayinkhui, mibingwui pangshap awui azingli kahaiali.

³ O PROHO, mikumo khikachangda nana ali theikhami, lah miwui naomayara khinida awui vang phaningkhami?

⁴Mi hi khaksuikha kathāna, awui atamva kanthuimamān kaji khaya̱ kathāna.

⁵O PROHO, nawui kazingram nemzangmida tungmilu! Phungreili saza̱mida meikhut shokranu!

⁶Rikhān ngasheikazamda athumli chaiyāngmihaolu, nawui malātheira̱ thaivāda athumli kupmichaohaolu!

⁷Atungshongwui eina napāng katingshokmilu, kathuka tara̱wui eina kanmida ili kahuimilu, makatheia mibingwui pāng eina,

⁸kakapik tui khamor eina khamatuia, athumwui yāpang che makhamashunga yāpangna.

⁹O Varivara, namingli ina laa kadhar akha sāra; khara̱ tharā kakā tingteilā ina huida,

¹⁰awungabingli khayui khame, narao Davidli ngatangkhuikhame!

¹¹Sākashi raighaiwui eina ili kanmilu, kala makatheia mibingwui eina ili kanshokmilu. athumwui khamorna kakapik tui matui, kala athumwui yāpangva thānkhangui yāpangna.

¹²Ithumwui naomayara ngarā athum yaronlakha rarkahai thingrong tharanu, ithumwui naongalāva̱ ngarā keinung sākhavai chithekwui pākra̱ sākhui kahaibing tharanu;

¹³Ithumwui zātshim pemranu, kashakazā ayur saikora eina; ithumwui luili yaola thingthing ngarumsangranu;

¹⁴sha̱keibingna anao kachungkha mataisangranu, anao vaida kalāshāt maleiaranu; lah mapharākharar maleiranu; ithumwui chanreili kachotwui ringkhangākhon mashālakaranu!

¹⁵Hikatha sokhami samkaphang mibing khamahaina! PROHO Varivarawui mibing kalā mahai!