Read Tangkhul Naga LAA 147 Bible Online

LAA 147 - Tangkhul Naga bible

LAA 147

¹PROHOli solu! Kaja ithumwui Vareli masotlaa kasā hi kaphāna; kaja a lumashantheilaka, chieina masot mingayilaka.

²PROHOna Jerusalem sakai, Israelwui raithā kahaibingli kazipkhui.

³Ana ning kathengbingli raimi, kala athumwui khamā ngahāmi,

⁴Ana sirāwui mashing shānkhui, athum saikorawui aming ana phokmi.

⁵Ithumwui PROHO reikhamataiana, pangshapla mavātmana; awui theishingkakhui ngashānla machaomana.

⁶Khangazanabingli PROHOna khāngmathota; makaphā makhayābingli ana ngaleili hortai.

⁷Ningkashi eina ngasoda PROHOli masotlaa sālu; ithumwui Vareli nimshimri eina tingteilā huilu!

⁸Ana kazingram muiyā eina fakhami, okathuiwui vang zingrot ngarānmi, kala kaphungli khawo kharngasaka,

⁹sāyurbingli ana kashakazā mizai, kala kakhonga hangkhānaolila mizai.

¹⁰Awui ningyāngkhaung siguiwui pangshapli maleimana; miwui pheilila ana khamathān maleimana,

¹¹kha ali khangachee athumli awui ringkaphā lei, awui makhangachei leikashili kachihānbing.

¹²PROHOli solu! O Jerusalem! Nawui Vareli solu, O Zion!

¹³Kaja ana nawui ngaveithing makang ngasakmi, nanaongarāli ana somi.

¹⁴Ana nawui tharilungli chingrihaimi, ana phameikap kaje zāt mizai.

¹⁵Ana okathuili awui ningkhami chihoshoka, awui tui thaklāk eina ngayaovai,

¹⁶sāhā thāda ana horam tāmi; ana hotlā thāda pamkok yaomi.

¹⁷Ana atangtang eina phāmkok shokngasaka; khamakui chiwui mangali khipāna nganingshapkhala?

¹⁸Ana awui tui chihoda, athum chi mengngasaka; ana awui masi phanngasaka, kala tara̱ longngasaka.

¹⁹Ana Jacobli awui tui phongmi, Israelli awui ainbing kala shiyan-chikan hāngmi.

²⁰Yur khangateili chithāda ana masālakmana, athumna awui ainbing matheimana, PROHOli solu!