Read Tangkhul Naga LAA 17 Bible Online

LAA 17 - Tangkhul Naga bible

LAA 17

¹Mashun ashot hi shāmilu, O PROHO; iwui khavao nganāmilu. Ningkathar morchai eina seihā kasā nganāmilu.

²Iwui mashun tharshokkhami nawui eina rāngasakmilu! Khamashung chi nawui mik eina theingasakmilu.

³Iwui ning nana chāng yanglala, ngayāshong nana ili rāyanglala, nana ili tamyanglala, makaphā masamphangmara; ikhamor eina khalāng masāmana.

⁴Mikumowui otsak apongli, nawui morchai eina kashok tui eina, ina khangashaobingwui shongfa eina yāma.

⁵Nawui shongfali ina zatchinga, iphei manganaithuilakmana.

⁶O Vare, ina nali ngakaoli kaja nana ili ngahānkāmira, nana nāshungmida iwui tui kashāmilu.

⁷Nawui makhangachei leikashi chi matakhak eina kachitheimilu, nawui yāpāngli yāmngayin khavai kaphābingli O huikhamiya.

⁸Namikna yangkhangai akha ngasāda ili mayonmilu, nawui angachāng khaya̱li ili thummilu,

⁹ili ngapon khavai makhayā, sakashe yangkashebingna kuinam kahaiwui eina.

¹⁰Athumwui wuklungli lukhamashanwui khāmong shunghaira, athumwui khamor eina langsolak eina matui.

¹¹Athumna ili yunzatta, ara ili kuinamhaira; ili ngaleili horsang khavai, athumna yangtitta lei.

¹²Athum serkazamkhangaia kazingkha̱ akha kathā thai, kazingkha̱naowui thāda rimda lei.

¹³Ngakarthuilu, O PROHO! Athumli ngasungmilu, athumli thuiyuimilu. Kala makaphābingwui eina iwui mirin nawui raighai eina kankhuimilu,

¹⁴okathuiwui ningmāng eina okathuiya mibingwui eina O PROHO, athumwui vang nana kazipmi kahai chieina athumwui wuk chipemranu; athumwui naongarānala kashapli lāngda samphangranu, athumwui angangnaobingwui vangla kataimiranu.

¹⁵Kha iva khamashung-khangarong eina nali yangra, ina ngakarkathui tharan nazak theilaga ningyāng unglakhaora.