Read Tangkhul Naga LAA 25 Bible Online

LAA 25 - Tangkhul Naga bible

LAA 25

¹O PROHO, imanglā nali yangkāli.

²O iwui Vare, Ina nali shitsanga, ili mamaishi ngasakalu; iwui yangkashena iwuitungli mamathānranu.

³Mha, nali honda khalei khipālikha mamaishi ngasakranu; maphākhuilakla yansaikazatbingli kakhayak ngasāranu.

⁴Nawui apong ili theingasakmilu, O PROHO; nawui shongfa ili tamchitheimilu.

⁵Ili nawui khamashungli thānmilu kala ili tamchitheimilu, kaja na iwui huikhamiwui Varena; ina nali langpongda ngaraipama.

⁶O PROHO, nawui lukhamashan, makhangachei leikashi, phaningmilu, kaja chi achālakhawui eina leichinga.

⁷I yaronlakhawui morei, kala iwui khayonkhamāng chi maphaningmialu; O PROHO, nawui makhangachei leikashi, nawui kaphā chiwui mangā eina ili phaningungmilu!

⁸Kaphā kala mashungrik kahai chi PROHOna, chiwui vang eina morei kaphungbingli ana apong chi tamchitheimi.

⁹Malung khanimali ana khamashung chili thānmi, kala khanimabingli awui apong tamchitheimi.

¹⁰Tuingashit kala hāngkahai khamayon athumwui vang, khangachei makhalei leikashi kala ningtongda shitkasang hi PROHOwui apongna.

¹¹O PROHO, namingwui vang eina iwui khayonkhamāng kapheomilu, kaja hi haklakhaowa.

¹²PROHOli khangachee mi chi khipākhala? Chipāli ana kapangkhuiki kaji apong chi ali tamchitheimira.

¹³Ana ringphālak eina okthuira, kala awui ara̱-azāna ram chi samphangra.

¹⁴Ali khangacheebingli PROHOna, ngasotnao sāmi, awui tuingashit athumli ana theingasaka.

¹⁵Ina PROHOli yangchinga, kaja ana khalenwui eina iphei khuishokmi.

¹⁶Iwuishong ngareirāda ili lumashanmilu; kaja I ngachakyang eina chotchānghaira.

¹⁷Ining kachot raimihaida sipkasāwui eina thānshokmilu.

¹⁸Iwui kakhanang eina kachotkachāng hi kaphāningmilu; kala iwui morei saikora kapheomilu.

¹⁹Iwui yangkashe kayākha leili kaji machukmilu, kala athumna khi sāshat yangkakharing eina ili yangkharingda lei.

²⁰Iyavo, imanglā mayonmida kanshokmilu, nali ngayinkakhuina, ili mamaishi ngasakmilu.

²¹Ningsā khangazip kala mashungrik kahai china ili mayonmilu, kaja ina nali ngaraili.

²²Kakhanang saikorawui eina Israelli ngatangmilu, O Varivara.