Read Tangkhul Naga LAA 31 Bible Online

LAA 31 - Tangkhul Naga bible

LAA 31

¹O PROHO, nali ngayin khavai ina phai; ili mamaishi ngasakmilakalu; nawui khamashung-khangarongli ili kanmilu.

²Ili kha-nāshungmilu, thākta kahuimilu. Na iwui vang ngayin khavai lunghār kasāmilu, huimi khavai iwui kapanga raipan ngasāmilu,

³Mha, na iwui lunghār kala raipanna; namingwui vang ili thānzatmilu kala ngakuimilu,

⁴ngathumda ili khalen sangkahai chiwui eina kakhuishokmilu, kaja na iwui ngayin khavaina.

⁵ Imanglā napāngli horsangkhamina; O PROHO, nana ili ngatangmihaira, shitkasang makhangacheia Varivara.

⁶Khikha masā khavai meoma̱li kaphaning athumli nana yangkharinga; kha iya PROHOli shitsanga.

⁷Nawui makhangachei leikashiwui vang ina ringphāda mathānra, khikhalajila nana iwui sipkasā theimihaira, iwui yangkashebingli nana theikhuihaira,

⁸kala yangkashewui pāngli ili mahorsangmimana; nana iphei khamashā pamli haimiya.

⁹O PROHO, ili khalumashanmilu, kaja I ringkashilungli leili; chapkhangachāwui vang imik, imanglā kala iphasāla kānhaira.

¹⁰Kaja iwui mirin kakhananglungli kānthuihaira, iwui zingkum sifafada peihaira. I ringshātwui vang yāngla kānhaira, ira̱kuila tāchiphaira.

¹¹Iwui yangkashebingna mana̱shi khavai, khongnainaona ngachee khavai sāthuihaira, ngasotnaobingwui vang khangachee-khangachā ngasāhaoda, chānreili samkaphangbingna iwui eina yāma.

¹²Kathinao thāda ili malaihaira; I ngayāng kahai hamkai ngasāthuihaira.

¹³ Mha, kachungkhana suikasa ui, ui, yā, yā khangachee ina shai! Ili makhamayā athumna sakrumda athumna imanglā khuithui khavai ngarāna.

¹⁴Kha, O PROHO, ina nali shitsanga. “Na iwui Varena” da ina hānga.

¹⁵Iwui atam napāngli lei, ili yangkashe, rekakharekbingwui pāng eina kakankhuimilu!

¹⁶Namai narao iwuitungli hormida, nawui makhangachei leikashiwui alungli ili kahuimilu!

¹⁷Ili makhayak ngasakmialu, kaja O PROHO, ina nali ngakaoli makaphābing maishiranu, athum khakshumda Kathewui ramli vāranu.

¹⁸Langsoda kala temshida mashunli mamayāmada, matheimiphutla khamatui kakapika morchaibing khak ma̱haoranu.

¹⁹O nali khangacheebingwui vanga, teokha phāda ngarānmihaili, nali ngayinkakhuibingli mibingwui miktāli teokha phāda sāmi kachangle!

²⁰Nawui mangāli nana athumli makaphā kasā mibingwui eina thumihai; athumli nawui ngayin khavai azingli malewui khamashātwui eina chingri haimiya.

²¹PROHOli sochikatlu, kaja keinung khuithui kahai thāda ili kuinamkahai tharan, ana matakhak eina makhangachei leikashi chi ili chitheimi.

²²Malung tātunghaida “Ili nawui eina katāva̱li kashamvāhaira” da hānga. Kha ngachonmi khavai ina kapo tharan nana shāmi.

²³Awui katharabing, PROHOli leishilu! Ningkatongabingli PROHOna mayonmi, kha ngamchoto eina kasābingli ana athut hāngsanga.

²⁴Panglu, kala nathumwui malung pingngasaklu, PROHOli kachihāna nathum saikora!