Read Tangkhul Naga LAA 35 Bible Online

LAA 35 - Tangkhul Naga bible

LAA 35

¹O PROHO, ili khangasungbingli ngasungmilu; ili khangararbing chili ngararmilu!

²Chāngvei ra̱pheng phungda ili thuingachonmilu!

³Ili kakharombingli kazei kala zeivār eina pharmilu! kala “I nawui huikhamena” da imanglāli hāngmilu!

⁴Imanglā khuikhavai kasābingli maishida khayak ngasaklu! Ili mamayāmada makaphā khangarānbing pa̱ngapāda latung ngasakmilu!

⁵Māhik masili phankathui thāda PROHOwui kazingraobingna athumli kashamhaoranu!

⁶PROHOwui raobingna kharomda, athumwui apong tangmating eina khanganaila nganairanu!

⁷Kaja maram maleila athumna ili khalen sanga; maram maleila imanglā khuikida chom chuiya.

⁸Matheisālakla athumli kashimān shokranu, khalen kasang chili athum khalatta manranu, shimān khavai athum chili tāzangranu!

⁹Chieina PROHOli imanglāna ringphāra, awui huikhamili sochikatra.

¹⁰Ira̱kui saikorana hāngra, “O PROHO, khangazanali nana huimi, pangmeikhar kajiwui eina khangazan khavātabingli shimān khavai kasā chiwui eina kankhame, na kathā khipa leili!”

¹¹Minama shākhibing thuinganinga; ina makathei otwui pongli athumna ngahāna.

¹²Kaphāwui vang athumna ili zakkashi hanmi; imanglā chānghaira.

¹³Kha athum kakazā tharan, ina borashi ngavai, ikhalatta khumda khananga. Ikui mathiktungli ngasunda seihā sai,

¹⁴ngasotnaowui, maningkha ichināwui vang kakhanang thāda; kui mashunda ava̱va̱wui vang sikafa thāda ina chapzata.

¹⁵Kha iphei khangaphok tharan athumna mathānda kazipta ringphai, ina makatheiya makaphā kasābingna khamashāt mathāhaimana.

¹⁶Athumna ahā tarilaga ili marmei khangai marmeida mana̱shipama.

¹⁷O PROHO, nana karankha yangfarakhala? Athumwui sakakathānwui eina, kazingkha̱wui eina imanglā ngatangkhuimilu.

¹⁸Chieina ina kahaka yarui kazipli ningkashi mira; hakkhamahā kazipli ina masot chigatra.

¹⁹ Iwui mashitsangkapai yangkashebingna iwuitungli mamathān ngasaklu, ili maram maleila yangkakharingbing mik makathap ngasaklu.

²⁰Kaja athumna chingri kahai mamatuimana, kha ram chili kasaikha kapambingli athumna kachipat tui machukkhui.

²¹Ili mamayāmada athum khamor makāchitheida, “Ahay, ahay, ithumwui mikna chi theihaira” da hānga.

²²O PROHO, nana theihaira; kasaikha mahaimialu! O PROHO, iwui eina matāmihaialu!

²³Iwui mashunwui vang kala iwui vang, iwui Vare kala iwui PROHO nana nganingmilu!

²⁴O PROHO, iwui Vare, ili mashun hāngsangmilu, nawui khamashung-khangarong athishurda; kala athumna iwuitungli mamathān ngasakalu.

²⁵“Ahay, ithumwui kaphaning ungshunghaira.” da athum khalatta mahāngranu, “Ali ithumna mayuisanghaira” majiranu.

²⁶Ili unshimui leihaoda khamathān athum pa̱ngapāda khayakrumranu! Micahshi, khayā khamala athumwui kashan kachon sāda ngavairanu,

²⁷Ili athut khuimikhangaibing china, mathānda vaoranu kala ringphāranu, “Awui raowui phākhavaili ningyāngkhaunga, PROHO hi reikhamataiyana” da vaochingranu.

²⁸Chieina nawui khamashung khangarong pongli imalena hāngra, kala langpongda masochikatra.