Read Tangkhul Naga LAA 40 Bible Online

LAA 40 - Tangkhul Naga bible

LAA 40

¹Ina PROHOli ning nganungkhung eina ngaraipama; ana ili nganāmida iwui khavao shāmi.

²Ngachakyāng kahai chom, khangavāt rāpurwui eina ili ana khāngshokmi, kala iphei lunghārtungli haimi iwui pheinai ngatar ngasaka.

³Ikhamorli ana laa kadhar sangmi, ithumwui Vareli masot khamiwui laa. Kachungkhana theida ngacheera, kala PROHOli athumna shitsangra.

⁴PROHOli awui shitsang khavai kasā mi, lāngkasoli mangareikathuiya, makhamashung varebingli thi makashura athum chi sokhami ngasaranu.

⁵O PROHO, iwui Vare, nawui matakhak kahai otsak, ithumli phaningkhami, mataisangmihaira; nali khipānakha mangatamrarmara! Saikora hi ina chishātta hāngra jilala shānla makhuimara.

⁶ Pha̱kaphayā kala kachigat nana ningkachāng maningmana, kha shākhavai nana ili khanā mathing ngasaka; rikkatā kachigat kala suiham chigat nana maningchāngmana.

⁷Chieina ina hānga, “Yanglu, I rārāli; khalui kahai lairiklungli iwui pongli kapihaida lei;

⁸O iwui Vare, nawui kaphaning chi ina sāmingailaka; nawui ain iwuklungli lei.”

⁹Kanshokkhamiwui ringkaphā chānpao hakkhamahā yarui kazipli ina hānghaira. Yanglu, O PROHO, nana kathei thāda imorchai morthum maleimana.

¹⁰Iningli nawui khangachon huikhami chi mathumhaimana; nawui huikhamila, ningtongda shitsang kapaiwui ponglila ina matuihaira; nawui makhangachei leikashi kala ningtongda shitkasangla ina mathumhailakla hakkhamahā yarui kazipli hāngsanga.

¹¹O PROHO, iwui eina nawui lukhamashan makhuithuimihaialu, nawui makhangachei leikashi kala ningtongda shitkasang china ili ngākmichinglu.

¹²Kaja mashānkharar makaphāna ili kuinamhaowa; iwui khayonkhamāngna ili khuithuihaira, ina matheikharar eina tangda; athum chiya ikuisamli chungmei; I malung tātunghaira.

¹³ O PROHO, lumashanda ili kakanshokmilu! O PROHO, ili ngachomi khavai kathākmeilu!

¹⁴Imanglā khuikida kasā athumli pa̱ngapāda maishi ngasaklu. Ili chotngasak kajibingli khalatta pa̱ngapāda maishi ngasakmilu.

¹⁵Ili, “Ahay, Ahay” kajibing, athum maishida ngacheeranu.

¹⁶Kha nali kaphā saikora ringphāda mathānranu; nawui huikhamili leikashibingna “Hakkhamahā chi PROHOna” da hāngranu.

¹⁷Iya, kachāma kala khavātana; kha PROHOna iwui vang phaningmi, Na iwui huikhame, kala ngachonkhamena; O iwui Vare, mahui nganongalu!