Read Tangkhul Naga LAA 48 Bible Online

LAA 48 - Tangkhul Naga bible

LAA 48

¹Reikhamatai PROHOlaka, khayāshilak eina sochikatrali ithum Varewui keinungli,

² Juikhamatai khamathā awui kathara kaphung, okathui saikorawui mathān khavaina, atungshong katāva̱li khalei, khareia Awungawui keinung Zion kaphung.

³Chiwui raipanbingwui alungli Vare akhalattana makhangapat nganingme sāda chitheimihaira.

⁴Kaja yanglu, awungabing kaziphaira, athum rāngarumhaira.

⁵Athumna chi rātheikhaleoda khakshingaka, athum pa̱ngapāhaowa, athum yāmhaowa;

⁶sha̱naona naokhara̱ kachot thāda, athum chili kathirkapophaowa,

⁷Tarshishwui jahasbing chi nana zingshoshongwui masi eina sākakhui chithāda.

⁸Ithumna shākahai thāda, ithumnala theihaira ashangva̱wui PROHOwui keinunglungli, ithum Varewui keinungli, chi Varena katang mavaila sakā kahaina.

⁹O Vare, nawui makhangachei leikashi chi nawui khorumshimli ithumna phaningkhui.

¹⁰Nawui ming mara̱sa̱da, O Vare, nawui masot okathui vākatanglila vāshunga. Nawui yāpangli khayuina pemtinghai;

¹¹Zion Kaphung mathānranu! Judah naongalāva̱ nawui bicharwui vang mathānranu!

¹²Zionli kuiung-kuivālu, ali kuimareizatlu, awui dolanbing mashing shānkhuilu.

¹³Chiwui raipan yangkhui kazaklu, awui khamashonpambing yangvapeilu; chithāda nana khanuithotli hāngchitheipaira.

¹⁴Kaja mashimānda makashimān Vare hi ithumwui Varena. Mashimānda ana ithumwui thānkhame sāra.