Read Tangkhul Naga LAA 5 Bible Online

LAA 5 - Tangkhul Naga bible

LAA 5

¹Iwui tui khanganāmilu, O PROHO; iwui ringkhangākhon kashāmilu.

²Iwui khavao khon hi kashāmilu; iwui Awunga, iwui Vare, kaja ina nali seihā kasāna.

³O PROHO, ngathorshong iwui akhon nana shai; ngathorshong ina nawui vang pha̱kaphayā akha ngarāna kala hona.

⁴Kaja na makhayāli ningyāng khaunga Vare maningmana; makaphā china nali mangasozatmara.

⁵Langkaso china nawui miktāli manganinglengmara, makaphā kasābing saikorali nana ningkachai.

⁶Kakapik tui khamatuia athum chili nana shimān ngasaka; ashee ra̱kachanga kala mikhanama mibing chili PROHOna ningkachai.

⁷Kha iva nawui makhangachei leikashiwui makhavāta chiwui mangā eina nawui shimli zangra, ina nawui kathara khorumshim chili khangachee eina nali khorumra.

⁸Ili thānmilu, O PROHO, nawui khamashung-khangarongli, khikhalajila iwui yangkashebingwui vang; iwui mangāli nawui shongfa ngatar ngasakmilu.

⁹ Kaja athumwui khamorli khamashung maleimana; athumwui wuklung chiya shimān khangasakana, athumwui kharok phutkahai chikhurna, athumna male eina sotmasaowa.

¹⁰Athumwui khayon chi athumli phungngasaklu, O PROHO; athum khalattawui hāngkachithei china athumli konglui ngasakranu, athumwui khayonkhamāng kachungkha chiwui vang athumli horshokhaolu, kaja, athumna nali ngakaishihaira.

¹¹Kha nali ngayinkakhuia saikora mathānranu, athum khamathānwui laa sachingranu; kala nana athumli ngākmilu, chithāda nawui mingli leikashe athumna nawui alungli mathānranu.

¹²Kaja khamashung-khangarongali nana somi, O PROHO; nana ngahānkhangai eina ali chāngvei thāda nana farormi.