Read Tangkhul Naga LAA 50 Bible Online

LAA 50 - Tangkhul Naga bible

LAA 50

¹Pangshapa, Vare PROHOna, zimik kashokwui eina thuida katun eina tangda matuida okathuili hokhui.

²Khamathā kākashunga Zionwui eina, Varena horshoka.

³Ithumwui Varena rāda kasaikha mapamana, awui mangāli chuikakachupa mei lei, ali kuimareida siphan zingrot lei.

⁴Awui yurli bichar sākhavai atungshong kazingramli, kala okathuili ana hoi.

⁵“Pha̱kaphayā eina ngasoda ili tuingashit kasā, ningtongda shitsangbing iwui ngalemli kaziplu!”

⁶Kazingramna awui khamashung khangarong phongmi, kaja Vare a khalatta bichar kasaana.

⁷“Nganālu, O iwui yurbing, chieina ina hāngra, O Israel, ina nawuitungli hāngphatra. I Vare, nawui Varena.

⁸Nathumna pha̱kaphayāwui vang ina nathumli khamachin maningmana; nathumwui rikkatā kachigat thangkachida iwui ngalemli lei.

⁹Nathumwui shim eina ina mukkā makhuimara, nathumwui yaoshangwui eina mevāla makhuimara.

¹⁰Kaja ngahongwui sā kachiva̱, kaphung thingthingli khalei sha̱keila iwuina.

¹¹Yongkazata vānao saikora ina thei, kala ngaleili kazat saikorala iwuina.

¹²“I thaisāsi kaje, ina nathumli mahāngmara; kaja apuk-apaga kala chili khalei saikora iwuina.

¹³Ina seiwui asā shaila, lah meshee mangla?

¹⁴Ningkashiwui pha̱kaphayā Vareli chigatlu, Juimeikap kachipāli nana khangashit sākahai chi milu;

¹⁵kala kakhanang atamli ili ngakaolu; Ina nathumli kanshokmira, nathumna ili tekmatei ngasakra.”

¹⁶Kha makaphā makhayābingli Varena hānga, “Iwui shiyan nathumna hangtā khavai khimashun leikhala? Maningkha iwui tuingashit nathum morchaili parhai khavai khi mashun leikhala?

¹⁷Kaja nathum kharākli yangkharinga, iwui tui nathumna khanukshong horhai.

¹⁸Nathumna khale mi theiakha awui ngasotnao sai, kala phokaphābingli nathum ngasozata.

¹⁹“Makaphā otli nathumwui khamor makhāmmana, kala nathumwui male eina mikhanam ot sai;

²⁰Nathumna pamda nachināli makaphā tui hāngpama; nava̱wui naoli nana mashāta.

²¹Hikatha hi nathumna sāhaira, kala ina kasaikha pama, ila nathum kathā akhanada nathumna phaninga. Kha ara nathumwui mangāli kaphen khuishokta ina kakaharna.

²²“Hi machutkhuilu, Vareli malaikahai nathum; maningakha ina serkazamda khipākhana kanshokmi khavai maleisāmara!

²³Ningkashi pha̱kaphayā sāda khuikharābing ili khayākashina; apong mashungrik kahai chili ina Varewui huikhami chitheira!”