Read Tangkhul Naga LAA 55 Bible Online

LAA 55 - Tangkhul Naga bible

LAA 55

¹O Vare, iwui seihā kasā nāshungmilu; Ina kapowui eina nakhalatta mangathummihailu!

²Ili yangmilu, kala ngahānkāmilu; ili kakhanangna yuihaira. I khanangnāhaira

³yangkashebingwui akhonna; makaphābingna singkharenghaoda. Kaja athumna iwuitungli kakhanang khuirai, kala malungkhavāta athumna ili yangshilāka.

⁴Ining chotnāhaira, kathiwui khangachee iwuitungli rāshunghaira.

⁵Khangachee kakathir ili rāhaida khangachee khangachāna pemhaira.

⁶“Iyavo, ila nāsha̱ thāda angachāng kasi kaje! Ina yongthuihaida chingri angasāmhaora.

⁷Mha, ina katāva̱li thuihaida, lamhāngli vāpamhaora.

⁸Siphan zingrot khangasha̱wui eina ngayin khavai thākta akha vāphākhuihaora” da ina hānga.

⁹Athumwui khangarān sakhaimihaolu, O PROHO athumwui tui onmihaolu; kaja keinungli khangama̱ khangashao ina thei.

¹⁰Ngashun ngayā athumna phākho kuimareida zata, chiwui alungli zakkashi khonkazarmāng lei,

¹¹ja̱tā kahai chiwui alungli lei, rekakharek eina namkazā leihngapha̱ chiwui eina mapakthuimana.

¹²Yangkashemāngna ili ngashimkashisi kaja— ina khāngshapra; yuikashemāngna sālākrada zakshida kasāsi kaje ina awui eina yāmngathumshapra.

¹³Kha ili ngaraikachā, iwui khavāknao, theikakasaiya ngasotnao chi nana.

¹⁴Ini leishiri eina chān ngazekrumrum jiya; Varewui shimli ngarumda yaothuirumsai.

¹⁵Athumli kathi rāshungranu; kharing eina Kathewui ramli vāranu; khangachee khangachā eina chikhurli zangranu.

¹⁶Kha ina Vareli ngakaowa; kala PROHOna ili huimira.

¹⁷Ngazin eina ngathor kala ngashun mateila ina maringkaphā hāngphatta ngahuipama, kala ana iwui khon shāmira.

¹⁸Ina rai ngararda khaleiwui eina imanglā ana chingri haimira, kaja kachungkhana ili mamayāmada kaziphaira.

¹⁹Achālakhawui eina wungpamkhongli chipam kahai ana shāmida athumli hamsang ngasakra; khikhalajila athumna ain mamayonmana, kala Vareli mangacheemana.

²⁰Iwui ngasotana awui ngasotnaobingli mamayāmada pāng khāngda awui tuingashit sākhai.

²¹Awui tui seina̱khanli lāngda nganaimei, kha wuklungli raiwui ning mānga; awui tui thaoli lāngda mayomei, kha athum chiya raighai kasing kathāna.

²² Nawui otphun PROHOli ngavātalu, ana yangmira; khangarongali ana mangatha̱ ngasaklakmara.

²³Kha, O Vare, nana athumli thukmeikap kaji chomli horsanghaora; ashee ningkachāngbing kala kachipatabing, athumwui mirin tangkhaila maokthuimara. Kha iva nali shitsangtha̱ra.