Read Tangkhul Naga LAA 56 Bible Online

LAA 56 - Tangkhul Naga bible

LAA 56

¹O Varivara, ili khalumashanmilu, kaja mibingna ili naikazamda lei; langpongda yangkashebingna ili rekhareka;

²langpongda ili yangkashebingna naikazampama; kaja kachungkhana langsolak eina ili ngararpama.

³Ina khangachee tharan nali ining horsanga.

⁴Awui tuili ina masot kachikata Vare, khangachee maleila Vareli ina shitsanga. Phasā khavaiana ili khi sāthukra?

⁵Langpongda athumna ili khanang khavai sai; athumwui ning ili zakkashiwui vang māng phaninga.

⁶Athum khalatta kharupkhuilaga ngarumda rimpama, iwui pheikār athumna ra̱yangpama. Athumna imanglā khuikida khangaraiwui vang,

⁷athumwui khayon chiwui vang athumli athut hāngsangmilu; O Vare, lungvāt eina mibingli maikashi milu!

⁸Ina ngareishok ngareizang kasā nana shānkhuihaira; iwui chāra̱ nawui liklili thaimihailu! Chi nawui lairikli mazangmala?

⁹Chieina ina kaho atam tharan iwui yangkashebing ngareiungra, Vare iwui vangna kaji hi ina thei.

¹⁰Awui tuili ina masot khamia Vare, awui tuili ina masot khamia PROHO,

¹¹Vareli ina khangachee maleila shitsanga, mina ili khi sāthukrakhala?

¹²O Vare, ina nali ngashit kahai chi sālakra, Ina nali ningkashiwui kachigat mira.

¹³Kaja nana kathiwui eina imanglā khāngshokmi, ina Varewui mangāli kharinga kahorli zatkhavai, mha, iphei makonglui ngasakmana.