Read Tangkhul Naga LAA 65 Bible Online

LAA 65 - Tangkhul Naga bible

LAA 65

¹Zionli khalei, O Varivara; masot nali mingayiya, kala nali khangashit sāserra.

²O seihā kasā shākhame na! Phasā khavaia saikorana nali rāsera.

³Ithumwui khayonkhamangna ithumli yuikahai tharan, chi nana pheomi.

⁴Nana kapangkhuida nganai khangasak, nawui shimli kapama a chi sokhamina! Nawui kathara shim, nawui shimwui kaphā kasā china ithum ningyāng unghaora!

⁵Matakkhak kahai otsak eina nana ithumli ngatangkhami eina ngahānkāmi, O ithumwui huikhame Vare; okathui achikun saikorali khalei, kala vākhamayar shamadru saikorawui kachihāna chi nalaka;

⁶nawui pangshap eina phungrei sākhuida, nawui pangshap chithei;

⁷shamadruwui khangaphao, tara̱wui khangaphao, miwui khonkazar nana chingngasaka;

⁸chieina okathuiwui akatangli khalei a china nawui otsak theida ngachee; ngathor ngazinwui kashok kazang nana samida, khamathānwui vang vaongasaka.

⁹Nana okathuili yaorāda chili tara̱ chaimi, chili nana ngalei tumngasaka. Varewui kong tara̱ pemtinghai; nana athumwui athāyur ngarānmi, chithāda nana ngarān kahaina.

¹⁰Chāngkahaiya luili nana mavātla tara̱ chaimi, kajujui chi khayammihaida, zingrotna ngalei chorngasaka, kala somilaga reisang ngasaka.

¹¹Nawui makhavāt zingkum peida sāmi, nawui siguigari shongfa kachida thao ngayiya.

¹²Lamhāngwui seizātpam wonnui timda pemtaiya, kaphungbingna mathānthuphai,

¹³seihomphung yaoshangna pemtinghai, luiwuk hupta māthei hammithai, khamathānwui vang athumna laa sāngarumda vaoshoka.