Read Tangkhul Naga LAA 66 Bible Online

LAA 66 - Tangkhul Naga bible

LAA 66

¹Okathui hupta Vareli khamathānkhon vaolu;

²amingwui tekhamatei laa sālu, ali tekhamatei masot milu!

³Vareli hānglu, “Nawui otsak kayākha ngacheekhala! Nawui pangshap hakmahālakhaoda nawui yangkashebing namangāli khangacheena ngayumhaowa.

⁴Okathui huptana nali khoruma, athumna nali masotlaa sai, namingli sochikatta laa sai.”

⁵Rāyanglu, Varena khi sahairakhala: miwui alungli ana sākahai otsak ngacheekapaiana.

⁶ Ana shamadrula katheng ngalei onngasaka, mina kong chili phei eina makānkai, chili ithumna ali ringphai,

⁷awui pangshap eina mashimānda munga, awui mik miyurbingwuitungli yangmi— ngakaikashibing athum khalattana makhāngchikataranu.

⁸Ithumwui Vareli solu, O mibing; ali kasokhon shāranu,

⁹kharingabingwui alungli ithumli haikhame, ithumwui phei manganaithui ngasakmana.

¹⁰Kaja, O Vare, nana ithumli tamyanghaira; lupāsāli ruikhayang thāda nana ithumli tamyanghaira.

¹¹Nana ithumli khalenli manngasaka; kala ithumwui kashānli kharita otphun chiphuna;

¹²ithumwui kui nana mili naiza̱ ngasaka; meilunglila tara̱lunglila ithum zata; kha nana ithumli khamashāpamli thānshokmi.

¹³Nawui shimli ina rikkatā kachigat eina ngasoda zangra; iwui khangashit ina nali mira,

¹⁴ina khananglakha imorchaina matuitā kahai kala ikhamorna ngashit kahai chi.

¹⁵Asa kakā rikkatā kachigat nali chigatra, yaovā pha̱kaphayāwui meikhut eina ngasoda; ina mukkā kala mevāwui kachigat sāra.

¹⁶Ralu, kala nganālu, Vareli khangacheebing, chieina iwui vang ana khi sāmihaira̱ khala kaji ina hāngchitheira.

¹⁷Ina ali panglāk eina vaowa, kala imale eina ali masot chikata.

¹⁸Iningli makaphā makhayā kasā ning zangsi kaja PROHOna mashāmisamara.

¹⁹Kha kachāngkhat Varena shāmihaira; iwui seihā kasākhon ana shāmihaira.

²⁰Vareli sochikatranu, khikhalajila ana iwui seihā makhalanmimana; lah awui makhangachei leikashila iwui eina makhuithuimihaimana.