Read Tangkhul Naga LAA 68 Bible Online

LAA 68 - Tangkhul Naga bible

LAA 68

¹Varena ngakarhuiranu, awui yangkashebing chaiyānghaoranu; ali yangkakharingbing awui mangāli yāmhaoranu.

²Meikhut phanthui kahai thāda athumli kashamhaoranu; meili khuira̱ khameng thāda, Varewui mangāli makaphā makhayā chi shimānhaoranu!

³Kha khangaronga mi mathānranu, athumna Varewui mangāli maiyāranu; athum mathānda ringpharanu!

⁴Vareli laa sālu, amingli sochikatta laa sālu, muiyātungli katonga chili laa vaolu; awui ming PROHOna, awui mangāli mathānlu!

⁵Avāva̱ makhaleibingwui avāva̱, ra̱meinaobingli yangkhame sāda, Varena awui katharapamli lei.

⁶Ngachakyāng kahaiali pamkhavai Varena shim mi, narkahaibingli ana mataikasang pamli thānshokmi, kha ngakaikashena tākok kahai ngaleili pama.

⁷O Vare, nana nawui mibingwui mangāli kazat tharan, nana lamhāngli kazat tharan,

⁸ okathui nganuka, kazingramna zingrot rotai, Vare mangāli; Sinai kānda nganuka, Vare Israelwui Varewui miktāli.

⁹O Vare, nana apam hupta makhavāta kazing rotā ngasaka; nawui shimluina kakhanangwui eina nana hanmilui.

¹⁰Nawui yao ashangva̱na sompam khavai samphanga, O Vare, nawui kaphā kasāwui alungli khavātabingli mizāi.

¹¹PROHOna kakaso miya; paokaphā phungkhami ashangva̱ chi hakmahālaka:

¹²“Raimibingwui awungabing, athum yāma, athumna yāma!” Sha̱naobingna ngaponkakhui shimli ngayara,

¹³athumna yaoshangli ngasopamlala— lupāsā eina romphin kahai nasha̱wui angachāng, pheimareng khamateka sinā eina kasā chi.

¹⁴Pangshapana awungabingli kashamyāng kahai tharan Zalmonli horām thaka.

¹⁵O hakkhamahā phungrei, Bashanwui phungrei; O kaphungton kachunga phungrei, Bashanwui phungrei!

¹⁶Khisāthuda yuishāt eina yangkhala, O kaphungton kachunga phungrei, Varena ningkachāng awui pamkhangai kaphung chili, mha, PROHOna mashimānda somkhavai chili?

¹⁷Pangshapa siguigarili ngasoda, thingtharā khanishida thingthingwuitungli thingthing, PROHOna Sinaiwui eina katharapamli rai.

¹⁸ Narkahaibingli thānda nana kaphung kajuili kai; mibing kala ngakaikashebingwui einala kachigat khuiya; kaja apam chi PROHOna sompam khavaina.

¹⁹Thangkachida ithumli khāngkhui khame PROHO chili soranu, Vare ithumwui huikhamena.

²⁰Ithumwui Vare hiya huikhame Varena; kala kathiwui eina ngatangkashok chi VARE, Prohowuili lei.

²¹Kha awui yangkashebingwui kui, khayon apongli kazata ahākazara awui wungkuihon chi Varena shaokhaira.

²²PROHOna hānga, “Athumli Bashanwui eina ina khuiungra, ina kathuka shamadruwui eina khuishokra,

²³chieina nathum ashee eina phei pheora, kala nathumwui fawui malena yangkashebingwui eina yar samphangra.”

²⁴O Vare, nawui mi ngaher eina kazat thei, kathara shimlungli iwui Awunga, iwui Varewui mi longzanga.

²⁵Laa kasābingna mangāli, laawui akap-akai kasingbingna naowa, angachaili ngalānaobingna timbrel shaozata:

²⁶“Hakkhamahā yarui kazipli PROHO Vareli soranu, O Israelwui ura̱ nathum.”

²⁷Athumwui ngachaili teomeikap kaje Benjaminna thāna, chili Judahwui wungnaobing, Zebulunwui wungnaobing, Naphtaliwui wungnaobing zanga.

²⁸O Vare, nawui pangshap kazipkhuilu, nawui yang chitheilu, O Vare, ithumwui vang sākhame.

²⁹Nawui Khorumshim Jerusalemli leihaoda awungabingna nali lemmet phungrāmi.

³⁰Kaharlu Egypt, khararli khalei ramsāli, yurbingli kaharlu, seinaobingli khangayur seishang chili. Shai khangamarbing chili phei eina naikazamlu; raili khamathānabing chili kashamyānghaolu.

³¹Egyptna pithrai rāchigatranu, Ethiopiana Vareli pāng khāngkhavai thākta rāranu.

³²O okathuiwui wungrambing, Vareli masotlaa sālu; PROHOli masot chikatlu,

³³kazingram, achālakhawui kazingramli tongkazatali, yanglu, awui pangshapakhon, awui khon vaotāda lei.

³⁴Israelwuitungli ngam khalei Vare chiwui pangshap chitheilu, awui pangshap kazingli lei.

³⁵Awui kathara shimlui Vare hi khangachee khangachāna, Israelwui Vare, ana yāng pangshap awui mibingli mi. Varivarali soranu!