Read Tangkhul Naga LAA 69 Bible Online

LAA 69 - Tangkhul Naga bible

LAA 69

¹Ili huimilu, O Varivara! Kaja tara̱na akahung kāshunghaira.

²I pheinganin makhalei rāhukli tāzanga; I kathuka tara̱li zanghaoda, tara̱ khangaphaona ili kheirora.

³I chapsānhaira, iwui kharokla thenghaira; Vareli khangaraiwui vang imikla tangmanghaira.

⁴ Maram maleila ili yangkashebing ikuisamli chungmei; kapikta ili khangashaobing, ili shimān ngasakki kaji athum panglaka. Ina maleekakhui ara ina runphalungrala?

⁵O Varivara, iwui mangkhama̱ nana thei, Ina salāng kahai nawui eina thumkahai maleimana.

⁶Nali kachihānabingli iwui mangā eina makhayak ngasakalu, O saikorawui Proho VARE; nali kaphābingli iwui mangā eina mamaishi ngasakalu, O Israelwui Vare.

⁷Kaja ina misui kaphung hi nawui vangna, chiwui vang eina khayā khamalāna mai pemhaira.

⁸Ichinā ngarāli kha̱mi thāhaira, pharākhangarum ishava̱wui ichina ngarāli zakmai makathei thāhaowa.

⁹ Kaja nawui shimwui vang ningkasangna mei thāda chuihaira, kala nali kazeibingwui kazei chi iwuitungli tāhaira.

¹⁰Khumda imanglā hamsang khangasak tharan, chi iwui khayon phākhavai ngasāhaowa.

¹¹Ina ngavai khavai porākachon kasā tharan, athumwui vang I chansā khavai ngasāhaowa.

¹²I hi ngaveili kapambing ngazeknganao khavai sāthuihaowa; kala khamaripabingna ili laa phoksanga.

¹³Kha O PROHO, iwui vanga, iwui seihā kasā nalina. Nana mayākapai atamli, khavāt makhalei makhangachei leikashi eina ngahānkāmilu. Nawui makhangachei ngachonkhami eina

¹⁴rāhukli tākazangwui eina ili kanmilu; yangkashebingwui eina kala kathuka tara̱wui eina ili kanmilu.

¹⁵Ra̱phongna ili mangaphaoror ngasakalu, lah kathukanala mamayuisang ngasakalu, lah chomnala iwuitungli khamor mashungkhamhairanu.

¹⁶Ngahankāmilu, O PROHO, kaja nawui makhangachei leikashi chi phālaka; nawui makhavāta lukhamashan athishurda, ili ngareira milu.

¹⁷Naraowui eina mai mangareithuimi haialu; kaja I chotchāngdalei, ili thākta ngahānkāmilu.

¹⁸Ili rānganaimilu, ili kahuimilu, ili yangkashebingwui eina ningkhān ngasakmilu!

¹⁹Iwui khayonkhamāng, iwui khayākhamala kala iwui maikashila nana thei; iwui yangkashebing nana theisera.

²⁰Zeikakharuina ining ngayānghaira, chiwui vang eina I chihān khavai maleithura. Ili lumashanmi khavai vang phai, kha akhanida maleimana; kala ninglum khavai phai, kha ili akhala masamphangmana.

²¹ Zātwui vang athumna ili kathiri mi, kala iwui ra̱chanwui vang mangkhavai kathurra̱ mimanga.

²² Athumwui zākhavai tablena khalatta khalen ngasāranu; pha̱kaphayā zātkhānala khalen ngasāranu.

²³Athumwui mik tangmangmihaida matheiranu, athum kashān nganukkapopchingranu.

²⁴Nawui malungkhavāt athumwuitungli heirorlu, nawui malungkathuina athumli ngaphankhuiranu.

²⁵ Athumwui rāmrah ngachakyānghaoranu, athumwui kachonshimli mi khipākha mapamranu.

²⁶Kaja nana tandi mikahaiya chili athumna rekhareka; kala nana khamā za̱mi kahaia chili athumna mataida khanang ngasaka.

²⁷Athumli tandiwuitungli tandi ngarormilu; nawui eina athum chihokhami masamphangranu.

²⁸ Athumli kharinga lairikwui eina ming sāshimithaoranu; athum khamashungabingwui alungli aming machanaranu.

²⁹Kha iva saza̱haida ngasheida lei; O Vare, nawui huikhami china ili kajuitungli haimiranu!

³⁰Varewui mingli laa eina na masotmira; ningkashi eina ali ina reingasakra.

³¹Hina mukkāli lāngda PROHOli ningyāng ungngasakra; angachee kala asho kakā chilila lāngmeida.

³²Rekkakharek samkaphanga china theida mathānranu; Vareli kaphā nathum, nathumwui wuklung china ning mathukranu.

³³Kaja khavātali PROHOna shāmi, kala narhaida khalei akhalattawui mili machinmahaimana.

³⁴Kazing eina ngaleina ali soranu, ngayi kala chiwui alungli ringda khalei saikorala.

³⁵Kaja Varena Zionli huimira, kala Judahwui keinung sakāluishitra; kala awui raobingna chili pānda chi khuira;

³⁶awui raobingwui naomayarana shimlui khuira, kala amingli leikashebingna chili pānra.