Read Tangkhul Naga LAA 7 Bible Online

LAA 7 - Tangkhul Naga bible

LAA 7

¹O PROHO, iwui Vare, ina nali ngayinkhuiya ili kakharomabingwui eina huimilu, kala kanshokmilu,

²kazingkha̱ thāda athumna ili serkazamhaipaishina, kanmi khavai maleithuda shimenthuihaipaishina.

³O PROHO iwui Vare, ina hi sāhairasaakha, iwui pāngli khangui leisaakha;

⁴iwui ngasotali ina makaphā eina hanmihairasaakha, lah iwui yangkasheli maram maleila sākhayāngmihairasaakha,

⁵iwui yangkashena kharomrāda ili ngaphankhuiranu, kala imanglā hi ana ngaleili naikazamranu, kala imanglā chifalungli horsangranu.

⁶Ngakarthuimilu, O PROHO, iwui yangkashebingwui malungkakang chili nawui malung kathui chieina nganingmilu; thuilu, O iwui Vare, nana bichar atam ngarānhaira.

⁷Kazip chiwui mibingna nali kuimareida pamranu; chiwuitungli, nawui pam kajuitungli khuimilu.

⁸PROHOna yurbingli bichar sai; O PROHO, iwui khamashung-khangarong athishurda, kala iwuili khalei ningsā khangazip chiwui athishurda ili bichar sāmilu.

⁹ Iyavo, makaphābingwui zakkashi chi tanghaoranu, kha khamashungbingli nana sākāmilu. ning kala wuklung tamkhayanga, na khamashunga Varena.

¹⁰Iwui chāngvei Varewuili lei, wuklung khangatarbingli huikhamena.

¹¹Vare hi khamashung-khangarong bicharwona, kala makaphāli thangkachida khayon khame Varena.

¹²Kachikathāna ning mangateiakha, Varena awui raighai kharāra, kala awui malā hunpinghaira.

¹³Khangachee-khangachām khutlai ana ngaranpinghaira, kala malāthingli meiri sanghaira.

¹⁴Yanglu, makaphā mi china zakkashi phaningpama, kala saphāphā kaji ningli phumpamda kakapik vātshoka.

¹⁵Ana chuida chom akha sākhui, kala chom chili khalatta tāzanga.

¹⁶Awui saphāphā kaji chi awui kuili latunga, kala khalattawui sāshat chi awuitungli ungtai.

¹⁷INA PROHOli awui khamashung-khangarongwui vang ningkashi mirān chi mira, kala juikhamataiya PROHOwui mingli ina laa sāda masot mira.