Read Tangkhul Naga LAA 71 Bible Online

LAA 71 - Tangkhul Naga bible

LAA 71

¹O PROHO, ina nali ngayinkhui; ili mai mashi ngasaklakalu!

²Nawui khamashung khangarong chili ili huimida kanmilu; ili nāshungmilu, kala kahuimilu!

³Na iwui ngayin khavai lunghār, kapanga raipanna, ili huimi khavai kasāmilu, kaja na iwui lunghār kala iwui raipanna.

⁴O iwui Vare, makaphāwui sākashi pāng, mashun makhalei kala sākashewui pāng yonkakhuiwui eina ili kakanmilu.

⁵Kaja, O PROHO, na iwui chihān khavaina, O PROHO, I nganuilakha eina thuida na ina shitkasangana.

⁶Kapharā eina thuida ina nali shaipama; ishāva̱wui naopam eina ili khuikhami chi nana. Ina masot mishon kaji chi nawui ponglina.

⁷I athum kachungkhawui mangāli sākachithei kathā thāhaowa, kha na iwui kapanga ngayin khavaina.

⁸Langpongda ikhamor nawui tekhamatei kala masotna pemtinghai.

⁹Ili asārlam machihomihaialu; iyang kānkahai tharan mahormihaialu.

¹⁰Kaja imanglā khuikida khangarānbingna ngasan ngarokta hānga,

¹¹“Varena ali horhaira; kharomda ali tukkhuilu, kaja ali kankhame maleiluimana” ji.

¹²O Varivara, iwui eina matāthuimialu; O iwui Vare, ili thākta khangachonmilu!

¹³Ili kaphenabingli maikashi mida shimānhaoranu; ili saza̱ khavai phākazatbingli yangkakharing kala maikashina romhaoranu.

¹⁴Kha ina katang mavaila chihānchingra, kala nali chungmeikhangai chungmeida sochikatra.

¹⁵Ikhamorna nawui khamashung otsak, nawui huikhamiwui otsak langpongda hāngra, kaja athumwui mashingna iwui aworli mataimeihaowa.

¹⁶Proho VAREwui pangshap otsak eina ngasoda ina rāra, ina nawui khamashung khangarongmāng chili sochikatra,

¹⁷O Varivara, nganuilakhawui eina thuida nana ili tamchitheimihaira, kala ina arui eina tangda nawui matakhak kahai otsak vaochingda lei.

¹⁸Chieina sarhaida kasārsam kashok atamlila, O Varivara, ili horkahai masāmialu, rāki kaji thot saikorali nawui pangshap ina mahāngseranglakha eina tangda.

¹⁹O Varivara, nawui pangshap kala khamashung khangarong kazingram kāshunga. Hakkhamahā ot sāmi kahaia, O Varivara, na kathā khipā lei?

²⁰Ili nana kakhanang chungmeikharda theingasaka, kala mathuk ngasakluira; okathuiwui kathukawui eina nana ili khangshokluira.

²¹Iwui khayākakā nana mataisangmira kala ili ning lum ngasakluira.

²²O iwui Vare, nawui ningkatongwui vang, ina tingteilā einala nali masotlaa chikatra; ina nali mazui einala masotlaa sāra, O Israelwui Kathara!

²³Ina nali masotlaa kasā tharan, imorchaina khamathānwui vang ngatangkhuimi kahai imanglānala vaora.

²⁴Langpongda imalena nawui khamashung ngachonkhami tui hāngra, kaja ili sāza̱ khavai kasā athumli nana maishi ngasakhaira.