Read Tangkhul Naga LAA 74 Bible Online

LAA 74 - Tangkhul Naga bible

LAA 74

¹O Varivara, ithumli khisāda nana chihochaohaokhala? Nawui seihomphungwui yaobingli khisāda malung khākhala?

²Achālakhawui eina nana nganaokhui kahai nawui miyurbingli phaningungmilu, nawui shimluikat sāda ngatangkhui kahaibingli phaningungmilu! Nana sompam khavai Zion Kaphungli phaningungmilu.

³Ngayānglaga leiching kaje keinungli yaorāmilu; katharashimli khalei kachiva̱ yangkashena sākazammiserhaira!

⁴Nawui yangkashebingna nawui katharapamli khangangpama; athumna athum khalattawui machut khavai philān khāngkai.

⁵Atowui zangkhavaili thing sakakā pheinai chi athumna ngahā eina mara̱tekhaira.

⁶Kala thing eina yekkakhui saikora athumna yāmkarnao kala ngahānao eina ngaphitkhaitāmiserhaira.

⁷Nawui kathara shim athumna mei sa̱tai, naming sompam khavai sāmakhaomida.

⁸“Athumli ithumna yuikhuichaora” da athum khalatta hāngngaroka; athumna ngalei chili khalei Vareli khorum khavaipam saikora sa̱tāserhaowa.

⁹Ithumwui machut khavai ithumna matheimana, marān maleiluimana, atam karankharakhala da kathei ithumwui alungli akhala maleithura.

¹⁰O Vare, yangkashebingna karankha mana̱shira? yangkashena namingli mashātchingrala?

¹¹Khisāda napāng kasaikha haihaokhala? khisāthuda nawui yāpang namathik tungli haipamkhala?

¹²Chithālala Vare, iwui Awunga, achālakhawui eina okathuili huikhamiwui ot kasāna.

¹³ Nawui pangshap eina shamadru ngakaimi, tara̱tungli dragonbingwui kui napāng eina shaokhai.

¹⁴ Leviathanwui kui nana katitkhai, kala lamhāngwui sāwui vang kashakazā sāda chishai.

¹⁵Ura̱la, kongrāla nana urngasaka; longshon longthai kaji kongrā thengngasaka.

¹⁶Ngashun nawuina, ngayāla nawuina; zimikla, kahora saikorala nana sākhui.

¹⁷Okathui kuimareida angarit nana sāmihaira; zur-kān nana sāmihaira.

¹⁸O PROHO, hi phaningungmilu, yangkashena kathāda mana̱shili, mashitkasanga mina namingli mashāta.

¹⁹Nawui nāsha̱wui manglā ramsābingli mamihaialu, nawui khangazanawui mirin mamalaimichaohaialu.

²⁰Nawui tuingashit phaningungmilu; kaja ram hiwui tangkhamangpam kachiva̱ khangashao miyurna pemtinghaira.

²¹Khangazanali mai mashi ngasakalu; kachāma kala khavātabing namingli masot chigatranu.

²²O Varivara, thuilu, nawui angalang phayatmilu; phaningungmilu, mashitkasangana langpongda nali kathāda mana̱shilikhala?

²³Yangkashebingwui maikhareo chi, kala nawui yuikashe bingwui khonzarshon kaji chi mamalaimihaialu.