Read Tangkhul Naga LAA 77 Bible Online

LAA 77 - Tangkhul Naga bible

LAA 77

¹Ina Vareli panglāk eina ngakaowa, ana ili shāmi khavai Vareli pangda ngakaowa.

²Iwui kakhanang atamli ina PROHOli phai; kachot maleila ngayā ipāng katingthai; imanglāli ningnganung khavai hānglala mamayāmana.

³Ina Vareli phaninga, kala ina ngahuiya; Ina machuka, kala imanglā vānhaowa.

⁴Imik mamikpi khavai nana rakngasaka; I khanangnāhaida tuila mamatuithukmana.

⁵Ina achālakhawui atam chi phaningkachunga, Ina kasāngkha thuikahai kumbing chi phaningunga.

⁶Ngayā iningkhalat eina chan ngazeka; Ina machuka kala imanglā kapeoyanga:

⁷“PROHOna mamayāchingmarala, kala mangahānngailui arala?

⁸Awui makhangachei leikashi ngasāmchang kahaila? Awui tuingashitbing tangchang tangkahaila?

⁹Varena lukhamashan malaihaola? Malung vavāt eina awui lukhamashan shungkham kahaila?”

¹⁰Chieina ina hānga, “Juikhamataiawui yāpang ngachei kahai hi iwui vanga kakhanangna.”

¹¹Ina PROHOwui kasāsā ningli phaningkhuira; mha, acha nawui matakhak kahaibing chi ina phaningungra.

¹²Ina nawui ot kasā saikora; kala nawui hakkhamahā otsak phaningra.

¹³O Varivara, nawui apong katharana. Ithumwui Vare thāda reikhamatai vare khipā lei?

¹⁴Matakkhak kahai ot kasā yurbingwui alungli nawui pangshap hakmahā khangasaka Vare chi nana.

¹⁵Napāng eina nawui mi, Jacob eina Josephwui naomayarabingli ngatangmi.

¹⁶O Varivara, tara̱na nali kathei tharan, tara̱na nali kathei tharan, athum ngacheehaowa, mha, kathuka china kathira.

¹⁷Muiyābingna zingrot heitai, kazingna ngashuma; nawui malā apam kachida thaivai.

¹⁸Nawui kazing khangashumwui langpar surwui alungli lei; nawui rikhānna apuk-apagali horvada okathui kathirda nganuka.

¹⁹Nawui shongfa shamadru kānvai, nawui apong tara̱tungli kānvai; chithālala nawui pheichon matheimana.

²⁰Nawui mili yao ashangva̱ thāda thānzat, Moses eina Aaronwui pāng eina.