Read Tangkhul Naga LAA 78 Bible Online

LAA 78 - Tangkhul Naga bible

LAA 78

¹O iwui mibing, iwui tamkachithei nganākhuilu, ikhamorwui tuili nathumwui khanā nāshunglu.

² Ikhamor eina chānjam tui matuira; Ina achālakhawui thumkahai tui chi matuira;

³Ithumna shākahai kala theikahai, ithumwui avāva̱ ngarāna hānghaikasā chi.

⁴Athumwui naongarāwui eina chi ithumna mathumhaimara, kha shokrārāda khalei thotli hāngchitheira, PROHOwui tekhamatei otsak kala awui pangshap, kala ana sākahai matakhak kahai saikora chi.

⁵Ana Jacobli khangashit sāda Israelli awui ain mi; chi athumwui naongarāli tamchithei khavai ishāvā ngarāli kasoi.

⁶Chithāda chi shokrāda khalei thotna theikhavai, mapharārang kaja naongarāna thuishālaga anao ngarāli hāngmaronda,

⁷chiwui vang athumna Vareli kachihān leikhavai, kala Varewui otsakbing khamalai masāla, awui ningkhami mayon khavaina;

⁸kala athumna avāva̱ ngarāwui thāda, ning khamakanga kala ngakaikashi mithot, wuklung makhangatara mithot, Vareli maningkatonga mashitkasanga thāda masā khavaina.

⁹Ephraimnaobingna malā shaksālaga, rai sāthanghon yāmhaowa,

¹⁰Varewui tuingashit athumna mamayonmana, awui ain athishurda mazatmana.

¹¹Ana khi sāmihailikhala kaji malaihaowa, kala ana athumli tekhamatei sāchithei kahaila.

¹² Egypt ngaleiwui Zoan tampākli leilakha, avāva̱ ngarāwui miktāli matakhak kahaibing sāchithei.

¹³ Ana shamadru ngakaimihaida tara̱ ui-ya kazip ngasaklaga alungli kankā ngasaka.

¹⁴ Ngashun ana muiyā eina, kala ngayā pongda meiwon kahor eina athumli thānmi.

¹⁵ Lamhāngli lunghārbing shomida athumli chirchomlak eina shamadruwui tara̱ thāda shimāna.

¹⁶Ana lunghārwui eina kongrānaobing shokngasakta tara̱ kong thāda longtā ngasaka.

¹⁷Chithālala athumna ali mataimeida morei sai, lamhāngli leilakha Juimataimeikap kajeli ngakaishi.

¹⁸ Athumna ningkachāng kashakazā polaga, athumwui ningli Vareli tamyanga.

¹⁹Athumna Vareli mamayāmada hānga, “Lamhāngli Varena zāt rungmihaishaprala?

²⁰Ana lunghārli ngaphitta chieina tara̱ wokshokta kongrābing phongshilonga. Zātla mishapta, awui mibingwui vang sāla ngaranmishaprala?”

²¹Chiwui vang PROHOna chi kashā tharan, a malungkhavātna pemtinghaowa; Jacobwuitungli mei kāhaowa, Israelwuitungli awui malungkhavāt mataisanghaowa;

²²khikhalajila athumna Vareli shitkasang maleithuwa, kala awui huikhami pangshapli mashitsangthuwa.

²³Chithālala ana atungshong khalei kazingramli kasoi, kala kazingramwui khāmongbing shomi;

²⁴ kala ana zākhavai manna rotāmi, kala kazingramwui kashakazā mizai.

²⁵Mina kazingraobingwui kashakazā zai, ana kashakazā mavātlakla athumli chihotāmi.

²⁶Ana kazingramli zingshoshongwui masi phanngasaka, kala awui pangshap eina ana azingshongwui masi phanshok ngasaka;

²⁷chifa thāda ana athumwuitungli sā rotāmi, shamadruwui situi ngayāda angachāng kakā vānao rotāmi;

²⁸athumwui rāmrah alungli ana chihotāmi, athumna pamkhavai kuikhamareili.

²⁹Kala athumna zāda thotinghaowa, kaja athumna ningkachāng chi ana mihaowa.

³⁰Kha athumna ningkachāng chi mapenranglakha, zāt athumwui khamorli zāmahunglakha,

³¹Varewui malungkhavāt athumli tahaowa, kala ana athumwui kapangabing chili shaothata, kala Israelwui khamataiabingli nemngasaka.

³²Chithālala athumna morei sāchinga, matakhak kahai theilala athumna mashitsangmana.

³³Chieina athumwui atam khaksuikha thāda ana shimān ngasaka, kala athumwui mirinla ngachee ngachālak eina okthui ngasaka.

³⁴Ana athumli shaokathat tharan, ali athumna phai; athumna ningngateida thuklak eina Vareli phai.

³⁵Vare athumwui lunghārna da athumna phaningunga, Juikhamatai Vare athumwui ngatangkhamena da.

³⁶Kha athumna khamor eina ali sotmasaowa; athumna ali athumwui male eina kapika.

³⁷ Ali athumna shitsangchao majithuwa; awui tuingashitli athum mashungda masārarthuwa.

³⁸Chithālala ava lumashanhaoda athumwui khayon pheomi, kala athumli masāshimānmana; kasangkharei malungkathui khāmhaiya, kala awui malungkhavāt saikora mamathuk ngasakmana.

³⁹Athum phasā khavaiana da ana phaningunga; masi phanthuihaida malatkhaunga kathāna.

⁴⁰Lamhāngli kayākhashida athumna ali ngakaishikhala, kala siwukli ali ning saza̱ ngasakkhala!

⁴¹Latlui latluida athumna ali tamyanga, kala Israelwui kathara chili malung thuingasaka.

⁴²Awui pangshap athumwui ningli maleimana, lah yangkashewui eina athumli ngatangkhami zimiksho chila athumwui ningli maleimana,

⁴³Egypt ngaleili ana awui khamachut sākachithei, kala Zoanli matakhak kahai ot kasā saikora.

⁴⁴ Ana athumwui kong ashee onngasakta, chiwui vang kongrāra̱ mamangpai khavai sai.

⁴⁵ Hachāng sursur jihoda athumli mahāngkharar chotchāng ngasaka, kala khaifa eina athumli shimānngasaka.

⁴⁶ Ana athumwui kashakazā kalomli chishai, kala athumwui shairanra̱ tākahai athei-arai khaoyurli shaingasaka.

⁴⁷ Ana athumwui drakhārong thei eina shimān ngasaka, kala athumwui sycamorebing pham eina tākthata.

⁴⁸Ana athumwui seishangli theih eina, kala athumwui yaoshangli langpār eina chithita.

⁴⁹Ana athumwuitungli malung sākashi, lungvat, malungkakang, kakhanang, shimān khangasakwui kazingraobing chishota.

⁵⁰Awui malungkhavātwui vang apong akha sākhui; athumli ana kathiwui eina mayāmshok ngasakmana, kha mimao eina thingasaka.

⁵¹ Ana Egyptwui naochizai saikora shaothata, Hamwui kachonshimli athumwui yaronshapwui naopharat kharebing chi.

⁵² Chiwui thili awui mibingli ana yaonaobing thāda thānshokta lamhāngli yao ashangva̱ thāda ngakuizata.

⁵³ Ana kalā mashi khavai pongli thānzata, chieina athum mangacheemana; kha shamadruna athumwui yangkashebingli ngaphum ngasaka.

⁵⁴ Kala ana awui kathara ngaleili athumli thānvai, kala awui yāpangna yuikakhui phungrei chili.

⁵⁵ Ana miyur khangateibingli athumwui mangāli kashamihai, ana athumwui shimlui ngayarmi, kala Israelwui shangbingli athumwui kachonshimli chipama.

⁵⁶ Kha athumna Juikhamataiali tamyanga kala ngakaishi, kala awui ningkhami mamayonthuwa,

⁵⁷kha avāva̱ ngarāwui thāda ngareithuihaida yansailak eina sai; malā hunkashi thāda shireiung shireivai.

⁵⁸Kha athumwui kajuipambing sakāda china ali malung thuingasaka; athumna athumwui sākakhui meoma̱bing eina ali yuikashi mathuk ngasaka.

⁵⁹Varena kashā tharan, a malungvātlakhaowa, kala ana Israelli khalanchaohaowa.

⁶⁰ Mibingli ngasoda leikasā Shilohwui, kachonshim pam chihohaowa,

⁶¹ kala narhaikasābingli pangshap mihaowa, kala awui tekhamatei yangkashebingwui pāngli sangmihaowa.

⁶²Awui mibing raighaili misanghaowa, kala awui lungvāt awui shimluikatwuitungli tāngasaka.

⁶³Meina athumwui yaronnaobing chuitai, kala naongalāva̱ ngarāna shakkazā laa masāthuwa.

⁶⁴Athumwui pāngmonbing raighai eina pitai, kala athumwui ra̱meiva̱ ngarāna chapkhangachā maleimana.

⁶⁵Chieina kapiwui eina khamathuk thāda PROHO ngakarthui, yarkhoka mangthung kahai thāda vaowa.

⁶⁶Kala yangkashebingli yuichaohaida ana athumli katang maleila maishi ngasaka.

⁶⁷Ana Josephwui shimkhurli khalanhaowa, ana Ephraimwui shangli makapangkhuimana;

⁶⁸kha ana leikashe Judahwui shang, Zion Kaphungli kapangkhui.

⁶⁹Ana kazingram thāda awui kathara shim sākhui, ana katang mavaila sakā kahai okathui thāda.

⁷⁰ Ana awui rao Davidli kapangkhui; kala ali yaoshangwui eina khui;

⁷¹anao khangathān yaova̱ homkasāwui eina ali hokhui, awui mi Jacobli, awui shimlui Israelli homkhavai.

⁷²Ningkhangatar eina ana athumli homa, kala themlāk eina ngakuizatmi.