Read Tangkhul Naga LAA 80 Bible Online

LAA 80 - Tangkhul Naga bible

LAA 80

¹ O Israelli Homkhame, khanganāmilu, Josephli yao thāda homkhame! Cherubimtungli kapama na, horshoklu

²Ephraim kala Benjamin kala Manassehwui mangāli! Nawui pangshap khuishoklu, kala ithumli rākanmilu!

³O Varivara, ithumli kakhuisangmiluishitlu; ithumli huimi khavai namai kahormilu!

⁴O PROHO ashangva̱wui Varivara, nawui mibingwui seihā kasāli karankha malungvātfarakhala?

⁵Chāra̱wui khamui eina athumli nana phauihaira, Athumli chāra̱ mangkhavai pemtha̱da mihaira.

⁶Ithumli nana khongnainaowui mana̱shi khavai sāmihaira, ithumwui yangkashebingna athum khalattawui alungli mana̱shipama.

⁷O ashangva̱wui Varivara, ithumli khuisangmiluishitlu! ithumli huikhui khavai namai kahormilu.

⁸Egyptwui eina nana drakhārong akha khuishokmi, kala miyurbingli kashamhaida nana chi lingsanga,

⁹Nana chiwui vang ngalei sāmathai, china ngalei pemda angayung sa̱vai.

¹⁰Phungreibing chiwui khaya̱na fakhama, kahaka cedarthingwui aphāngbing china;

¹¹aphāngbingna shamadru vāshunga, atonbingna Kongrei vāshunga.

¹²Chithākha khisāthuda nana chiwui phākho sakhaimihao, apong chi rākakānbingna athei chi phākhui khavaila?

¹³Ngahongli khalei sivāna sākazama, kala luili kazata saikorana chi phāshai.

¹⁴O ashangva̱wui Varivara, khangareiungmilu! Kazingram eina yangtāmilu, kala theimilu; drakhārong hili khayangsangmilu;

¹⁵nawui yāpang eina lingsang kahai arong hi.

¹⁶Athumna chi mei eina thota, athumna chi yortekhaira; nana malungkhavāt eina yangda athum shimānranu.

¹⁷Kha napāng nawui yāpangli khaleipā chili tāshungranu, nakhalattawui vang kapanga sākakhuipa chi.

¹⁸Chithada sāda ithumna nawui eina mangareithuiluilakmara; ithumli mathi ngasakalu, chieina ithumna namingli ngakaora;

¹⁹O ashangva̱wui Varivara, ithumli kakhuisangmiluishitlu! ithumli huikhui khavai namai kahormilu.