Read Tangkhul Naga LAA 89 Bible Online

LAA 89 - Tangkhul Naga bible

LAA 89

¹Nawui makhangachei leikashi pongli ina laa sāchingra, O PROHO, nawui ningkatong thot kachida ikhamor eina vaora.

²Kaja nawui makhangachei leikashi katang mavaila sakāhaira, nawui ningkatong kazingram thāda ngazipa.

³ Nana hānghaira, “Iwui kapangkhui kahaibingli tuingashit sāhaira. Iwui rao Davidli ina ngashit kahaina:

⁴ ‘Nawui ara̱-azā mashimānda ina sakāmira, kala nawui wungpamkhong mithot peida sakāmira.’”

⁵O PROHO, kazingramna nawui matakhak kahai chili soranu, nawui ningkatong katharabingwui kaziplila.

⁶Kaja kazingli PROHOli ngaheokapai khipā lei? kazingli khaleibing PROHO kathā khipā lei,

⁷katharabingwui hanga̱pamli, ali kuikhamarei ngachaili awui thāda khayākakā khangamkharei khipā lei?

⁸O PROHO, ashangva̱wui Vare, nawui thāda sāshapa, ningkatonga khipā leikhala?

⁹Tara̱wui sākashili nana munga, khangaphao tharan nana chingrihai ngasaka.

¹⁰Kathingun thāda nana Rahabli sākachupa, nawui kapanga pangtheina yangkashebingli kashamkhayānghai.

¹¹Kazingram nawuina, okathuila, apuk-apaga kala chiwui lungli khalei saikora chila nana sākhuiser kajina.

¹²Atungshongla, azingshongla, nana sākhuisera, Tabor eina Harmonna mathānlak eina namingli sochikatli.

¹³Nawui pāngthei reimataiya, nawui kajuiya yapāng panglaka.

¹⁴Khamashung khangarong kala mashun nawui wungpamkhongwui shimphungana; makhangachei leikashi eina ningkatongna na mangāli rizata.

¹⁵Zātkhānwui vang khavao katheibing, O PROHO, nawui zakmai kahorli kazatabing sokhamina,

¹⁶langpongda namingli mathāna kala nawui khamashung chiwui vang masot chikata.

¹⁷Kaja na athumwui yangwui tekhamateina, nawui ngahānkhangai eina ithum khayā kai.

¹⁸Kaja ithumwui chāngvei PROHOwuina, ithumwui awunga Israelwui Kathara chili.

¹⁹Shitkasangbingli achālakha nana khamahā eina hāngmida “Pangshap khalei akhali ina kuihon sangmihaira, mibingwui eina kapangkakhuia chili ina reingasaka.

²⁰ Iwui rao Davidli ina phākhuihaira, iwui kathara thao eina ina ali neomihaira;

²¹chieina ipāngna ali ngasozatmichingra, ipāngtheinala ali pangngasakra.

²²Yangkashebingna ali mayuirarmara, makhayābingna ali mamaishi ngasakrarmara.

²³Awui yangkasheli ina awui miktāli sākachupra kala ali yangkakharingabingli shaothatra.

²⁴Iwui ningkatong kala iwui makhangachei leikashi ali ngasomira; kala imingli awui pangshap wui vang ali khayā kāngasakra.

²⁵Awui pāng ina shamadrulungli haimira, kala awui yāpang kongtungli haimira.

²⁶Ana ili, ‘Na ishāvāna, iwui Varivara, iwui huikhamewui lunghārna’ da vaoshokra.

²⁷ Kala ina ali naochizai sāngasakra, okathuiwui awungabingwui juimeikap kaje ngasāra.

²⁸Iwui makhangachei leikashi ina awui vang haimichingra, kala iwui tuingashit awui vang makailakmara.

²⁹Ina awui shimkhur sakāmida leichingra, kala awui wungpamkhong kazingramwui atam thāngasakra.

³⁰“Anao ngarāna iwui ain horhaikha, kala iwui ain athishurda mazatakha,

³¹kalikhada athumna iwui shiyan-chikan sakhaida iwui ningkhami mamayonakha,

³²athumwui khayonkhamāngwui vang lijei eina shongrān sāra, khangui khalāngwui vang lijei eina shaora;

³³kha iwui makhangachei leikashi awui eina makhuithuimara, iwui ningkatong mangacheimara.

³⁴Iwui tuingashit ina masākhaimara, lah imorchai eina shokkahai tui chila mangacheimara.

³⁵“Iwui tharkhamatheng eina ina akhashida ngashithaira; ina Davidli makapikmara.

³⁶Awui wungpam leichingra, zimik leilakha eina tangda awui wungpamkhong imangāli leichingra.

³⁷ Kachāng thāda mashimānla leichingra, kazing leilakha eina tangda, mangatha̱mara.”

³⁸Kha ara nana mamayāmada horshokhaira, thao neomi kahaiali nawui malungkhavātna pemhaira.

³⁹Naraoli tuingashit kasā chi nana makhuimithura; nana awui wungkuihon chifali sākhamāng ngasaka.

⁴⁰Nana awui phākho sakhaimihaira, nana awui raipan ja̱ta ngasakhaira.

⁴¹Khaung khavā saikorana ali sākazama, awui khongnaiwui mana̱shi khavai ngasāhaira.

⁴²Nana awui yangkashewui yāpang reingasaka, nana awui yangkashe saikorali mathān ngasaka.

⁴³Mha, awui raighaiton nana ngareiung ngasaka, kala nana ali raiphungli manganingrar ngasakmana.

⁴⁴Khānthing awui pāng eina nana khuithuihaira; kala awui wungpamkhong ngaleitungli hortāmihaira.

⁴⁵Mirin malingshap nana katatmihaowa; nana ali maikashina pemngasaka.

⁴⁶O PROHO karankharali? Nakhalatta ngathumchinghaorala? Nawui malungkhavāt mei thāda karankha chuifara?

⁴⁷Phaningmilu, O PROHO, mirin atam karankhakhala, kaja khi makankhanawui vang nana mibingwui naomayara saikora sākahaikhala!

⁴⁸Mi khipāna ringda kathi matheilakmakhala? Kathewui ramwui pangshap eina khipāna amanglā huikhuishaprakhala?

⁴⁹PROHO, achālakha nawui makhangachei leikashi, ningtongda shitsangkapai chieina ngasoda Davidli khangashit chi kali vahao?

⁵⁰O PROHO naraoli kathāda khonshihaira kaji kaphaningungmilu; mibingwui zeikakharui iningli kayākha chotta phung,

⁵¹khieina nawui yangkashena manashi, O PROHO, khieina nawui yangkashebingna thao neomikahaia awui pheikarli mana̱shikhala.

⁵²PROHOli mashimānda soranu. Amen, Amen.