Read Tangkhul Naga CHĀNSAM 15 Bible Online

CHĀNSAM 15 - Tangkhul Naga bible

CHĀNSAM 15

¹Khanima chānhāna malungkhavāt vān ngasaka, kha chānhan makhaungna malung thuingasaka.

²Thangkhamawui malena awor ngayarmi, kha mangkhama̱wui khamor eina mangkhama̱ tui heishoka.

³PROHOwui mik apam kachiva̱li lei, kaphālila kashelila ana mayonserda lei.

⁴Khanima male hi kharingawui thingrongna, kha sākashi chānhanna khamā za̱ngasaka.

⁵Mangkhama̱na avāva̱wui tamkachitheili ningkachai, kha hāngkhamachinli khuikasanga thangkhamana.

⁶Khangaronga miwui shimli lan kachungkha lei, kha makhayā miwui heiun kakhanangmānga.

⁷Thangkhamawui morchaina awor yaosangmi, mangkhama̱wuiva chi mathāmana.

⁸Makhayāwui pha̱kaphayā PROHOwui mangāli ningkakachaina, kha mashungrik kahaiwui seihā kasā awui ningyāng khaungna.

⁹Makhayāwui apong hi PROHOwui miktāli ningkakachaina, kha khamashung khangarongli kakharomali ana leishi.

¹⁰Khamashung apongli makazatabingli saklāk eina rākra, hāngkhamachinli kachin mi chi thira.

¹¹Kathewui ram eina Abaddon PROHOwui mangāli ngahāhang eina lei, mibingwui wuklung kayākha mataida leirakhala!

¹²Mana̱shikazārana ali mahāngmachin ngasakngaimana, ana thangkhamawuili mavāmara.

¹³Khamathāna wuklungna ningngai mathai, kha wukkakhanangna ning thengngasaka.

¹⁴Theishingkakhuiwui ningna awor phāzata, kha mangkhama̱bingwui khamorna khanguili kashakazā sai.

¹⁵Kakhanangbingwui mirin zakkashina, kha khamareo ningna lumlaochinga.

¹⁶Lan kachungkha leilaga khanangki kajiwui vānga, kateokha leilaga PROHOli khangachee phāmei.

¹⁷Yangkharing ngaroklaga kathao mukkā taithatshaiki kajiwui vanga, leikashi eina hanthing-hanrā kashai phāmei.

¹⁸Malung vātkazar mina nganang ngasaka, kha malung khanimna tuikashokli chingrihai ngasaka.

¹⁹Chāngshewui shongfa ka̱shatna pukrorhaowa, kha khamashungawui apong shongfa ashatva̱na.

²⁰Thangkhama naomayarana avāva̱li mathān ngasaka, kha mangkhama̱ mina ava̱va̱li ningkachai.

²¹Ning makhalei awui vanga mangkhama̱ otsak hi khamathānna, kha theishingkakhui mina mashungrik eina zata.

²²Hāngkachithei mazangakha khangarān nguithuihaowa, kha tarākha hāngkachithei eina ot ungshunga.

²³Tāzakta ngahānkakāna mili mathān ngasaka, kala machuk kazak kahai tui kayākha kaphā otkhala!

²⁴Thangkhamei miwui shongfana juikhamei mirinli thānkāmi, chithāda Kathewui ramwui azingli mavāmara.

²⁵Langkaso miwui shim PROHOna pheitāmi, kha ra̱meiva̱wui thari phārimi.

²⁶Makhayāwui kaphaning PROHOwui mangāli ningkakachaina, katharawui tuina ali ningyāng unga.

²⁷Makhamashung eina tongkazā khavaiwui vang khangamar mi chi awui shimkhurli khanang ngasaka, kha pheizā kazāli ningkakachai mina ringra.

²⁸Khangaronga mina khi ngahānkārakaji chukmaja̱ya, kha makhayāwui khamorli kashi [6] otmāng heishoka.

²⁹Makhayāwui eina PROHOna katāva̱li lei, kha ana khangarongawui seihā kasā shāmi.

³⁰Mikwui kahorna ningli mathān ngasaka, kala kadhar chānpaona ara̱kui nganaoung ngasaka.

³¹Akachang hāngkachitheili nganākasang mi thangkhameiwui alungli okthuira.

³²Tamkachitheili makhuikasanga mi chi akhalatta kachipatna, kha hāngkhamachin khuikasang mi theishingkakhui samphanga.

³³PROHOli khangachee hi thangkhamei tamkachitheina, kala khangahuina khayākakā samphangngasaka.