Read Tangkhul Naga CHĀNSAM 16 Bible Online

CHĀNSAM 16 - Tangkhul Naga bible

CHĀNSAM 16

¹Ning eina khangaran kasā hi miwuina, kha male eina ngahānkakā PROHOwui einana.

²Mi akhawui apong saikora awui mikyanli tharda thei, kha PROHOna manglāli chāng yanga.

³Nawui otsak PROHOli mihaolu, chieina nawui khangarān sakāmira.

⁴Ot kachiva̱ kharin leilaga PROHOna sākahaina, makhayā chila kakhanang zimiksho chiwui vangna.

⁵Yākhangai hi PROHOwui mangāli ningkakachai otna, ali tandi mamila machihomara kaji theilu.

⁶Khayākashi kala ningkatong eina morei pheomi, kala PROHOli khangacheewui vang mina makaphā masāmana.

⁷Mi akhawui apongna PROHOli ringphā khangasak tharan, awui yangkashe eina tangda ana chingrihai ngasaka.

⁸Makhamashung eina kachungkha samphangki kajiwui vanga mashun eina kateokha khalei phāmei.

⁹Miwui ningna awui apong ngarāna, kha PROHOna awui pheikār chiza̱mi.

¹⁰Kasatkhami tuitakbing awungawui morchaili lei; bichar kasāli awui khamorna morei masāmana.

¹¹Khamashung khān kala khāndam PROHOwuina, khaoli onsang kahai saikora awui otsakna.

¹²Khalāng kasā hi awungabingwui vang ningkakachaina, kaja wungpamkhong hi khangarong eina sākai.

¹³Khamashung morchai awungawui ningyāngkhaungna, kala khamashung tui khamatuili ana leishi.

¹⁴Awungawui malungkhavāt kathiwui paomena, kala thangkhamana ngachammira.

¹⁵Awungawui mai kahorli kharing lei, kala awui ngahānkhangai mayokachāng muiyāna zingrot khuirākhami kathāna.

¹⁶Sināle thangkhamei samkaphang phāmei, lupāsāle theishingkakhui kapangkhuitha̱ra.

¹⁷Khangarongawui apong kashiwui eina ngareithuihaowa; imawui shongfa khamayon china khalattawui mirin phāriya.

¹⁸Kashimān marāranglakha langkasona ri, kala makongluiranglakha khayāning khanganingna ri.

¹⁹Langkasoali ngasoda ngaponkakhui ngayarki kajiwui vanga, kachāmali ngasoda ngahuiri kahai ningngai khalei phāmei.

²⁰Tamkachitheili nganākasang china reisangra, kala PROHOli shitkasanga mi ringkaphāna.

²¹Ningwui thangkhamei chili mashun-makhui kathei hoi; kala chānhan khamathāna ngahānngaimwi ngasaka.

²²Thangkhamei khaleia a chiwui vanga thangmei chi kharingwui ura̱na, kha mangkhama̱ otsak hi mangkhama̱bingwui machin khavaina.

²³Thangkhameiwui ningna mashuntui matui, morchaili seihā ngarumsanga.

²⁴Kashima tui khuira̱ thai, manglāli shimngasaka kala phasā phāngasaka.

²⁵ Mashungrik kahai thada miwui mangali apong akha lei, kha chiwui akatang chi kathiwui apongna.

²⁶Kathaia mina zākhavai ot sai, akhamorna ali ot sāngasaka.

²⁷Makānkhanā mina kashi [7] ngarāna, kala awui chānhan mei kachui thai.

²⁸Ning khamakhui mina khanganang ngayao ngasaka, kala kasupkazat mina ngasotnao kachachang kaingasaka.

²⁹Ngashaokazar mina khongnainaoli suikhui kala ali makaphā shongfali thānvai.

³⁰Mik kakashi mina makhamashung otsak ngarāna, morchai kakatim mina makaphā shokngasaka.

³¹Kuingapoktham kahai hi khayākakāwui kuihonna; hi khangarongawui mirinli samkaphangna.

³²Malung mathuikazar mi china pangshap khaleiali phāmei, khalatta ngarinkashapa china keinung khuikashapali kachangmei.

³³Mikumona kalā yanga, kha PROHOwui khamayā eina kashokna.