Read Tangkhul Naga CHĀNSAM 2 Bible Online

CHĀNSAM 2 - Tangkhul Naga bible

CHĀNSAM 2

¹Inaomayara, iwui tui nana khuida iwui ningkhami mayonakha,

²thangmeiwui pongli nganāsangda, theishingkakhuili ningsangakha;

³mha, nana kalikhada kathuka theikhavai ngakaoakha, kala theishingkakhuiwui vang poakha,

⁴nana lupāsā kaphā thāda phaakha, kala ngathum kahai lan kaphā thāda phaakha;

⁵PROHOli khangachee chi theikhuira kala Varewui awor chi samphangra.

⁶Kaja PROHOna thangkhamei chi mi; akhamorwui eina awor kala theishingkakhui shoka;

⁷mashungrik kahaibingwui vang kaphā thangkhamei kazipmihai; ningsā yinglak eina okathuia miwui vang chāngvei sāmi,

⁸mashun shongpong mayonmi, kala awui katharabingwui apong phārimi.

⁹Chieina khamashung mashun-makhui kaphā apong saikora nana theikhuira;

¹⁰kaja thangkhamei kaho chi naningli zangra, awor china namanglāli ningyāng ungngasakra;

¹¹mashun ningna nali yangmira; theishingkakhuina nali ngākmira;

¹²makaphā apongwui eina nali kanmira, matuiphāphā kaji mi,

¹³khamashung khangarong apong horhaida, tangkhamang shongfali kazata,

¹⁴makaphā kasāli khamathāna kala makaphā otsakli ningyāngkhaunga;

¹⁵kha̱khamakhei shongfali kazata athum, athumwui apongla mangatarmana.

¹⁶Shuikhangareo sha̱naowui eina nali huimira, makhangatunva̱wui chānhān khamathāwui eina;

¹⁷ngalālakhawui khavāknaoli nothā kahaiva̱ kala awui Varewui tuingashit malai kahaiva̱;

¹⁸awui shim kathilungli ngaphuma, kala awui shongfa kathi khaya̱pam vāhaowa;

¹⁹ali khavā khipākha malatungmana, lah athumna kharing shongfala masamphangluimana.

²⁰Chiwui vang nana kaphā miwui apongli zatki kajina, kala khangarongawui shongfali mayonrali.

²¹Kaja khangarong mina ram chili okthuira, kala ningsā khangazipa mina chili pānra;

²²kha makaphā makhayābingli ngalei chiwui eina katathaora, kala khayomabingli chiwui eina phurshokhaora.