Read Tangkhul Naga CHĀNSAM 22 Bible Online

CHĀNSAM 22 - Tangkhul Naga bible

CHĀNSAM 22

¹Kashāng-khareile kaphā aming kapangkhuitha̱ra, kala sinā lupāle mina ngahānkhangai phāmei.

²Kashānga eina kachāma samphanga; PROHOna khaniniwui kasā akhavāna.

³Thangkhama mina kalākashi theida akhalatta yāmngathuma, kha ningkapaibingna vāmamānda chiwui kakhanang samphanga.

⁴PROHOli khangachee, ngahuiri kahaiwui sāman kashāng, khayākakā kala kharingna.

⁵Ningkhamakhuibingwui apongli ka̱shāt khalen pemtinghai; khalatta khangarin china chiwui eina katāva̱li lei.

⁶Naona zatvārān apong chi tamchitheilu, ana kharar tharan chiwui eina mapākthuimara.

⁷Kachāmali kashāngana munga, kala kashuka chi kachishutawui raona.

⁸ Makhamashung yaokasang mina kakhanang hātkhuira, kala awui lungthot lijei khikha masāvaimara.

⁹Mili yangmikathale somira, kaja kachāmali awui kashakazā ngayarzai.

¹⁰Mashātkatha̱li kashamhaolu, khanganangla yāmhaora; kala nganang khangazai vānhaora.

¹¹Ningkatharli leikashe, kala tuimatui leishiri kahaia, awungana awui ngasotnao sāra.

¹²PROHOwui mikna aworli yanga, kha shitkasang makhaleiawui tui ana horhaowa.

¹³Chāngshena “Ayarli kazingkha̱ lei! Ili chanreilli sāthathaora” da hānga.

¹⁴Morkasāp sha̱naowui khamor kathuka chomna; PROHOna malungkhavāt mi chi chili tāzangra.

¹⁵Mangkhama̱ hi naoshinaowui ningli lei; kha kharākwui lijei china katāva̱li kashamvāhaora.

¹⁶Khalattawui lan chungsang khavai kachāmali rekakhareka, lah kashānga mili khame chi khavāt leichingra.

¹⁷Nakhanā nāshunglu, kala thangkhameiwui tui nganākhuilu; kala nawui ningli iwui theithangkhamei sha̱khuilu;

¹⁸kaja nawui ningli chi thumhaiakha china nali ringphā ngasakra, saikora hi nakhamorli ngarānhaiakha.

¹⁹Nawui ningkatong chi PROHOli leikhavai ina aja hāngkachitheina, nalina.

²⁰Hāngkhamachin eina theithangkhameiwui pongli chānsam thumra ina nawui vang makapimimala,

²¹khamashung khangarong chi nali chitheikhavai, rākhangahānbingli mashun tui nana ngahānkāshap khavai maningmala?

²²Kachāmali a chāmhaowada matakzaalu; lah kakhananga mili ngaveili marekharekalu;

²³kaja PROHOna athumwui vang nganingmida sākakazam athumwui mirinla sākazammira.

²⁴Malung thuikazarali ngasotnao masaalu, thurkazar mili mangayuralu,

²⁵nala awui sha̱khuida nakhalatta khalenli manpaishina.

²⁶Kashukawui vang nganingmida leimanwui vang hamkahaia mi mangasaalu.

²⁷Nana khikha runkā khavai maleiakha khisāda nawui pet khuithuirakhala?

²⁸Achālakha navā ngarāna shunkahai thari maphuralu.

²⁹Them kathemawui ot kasa makatheihaira? ana awungawui mangāli nganingra, ana matheithangkhameia mibingwui ngalemli manganingmara.