Read Tangkhul Naga CHĀNSAM 24 Bible Online

CHĀNSAM 24 - Tangkhul Naga bible

CHĀNSAM 24

¹Makaphā mili mayuishialu, athumli ngayurga dala malungmachāngalu;

²kaja athumwui ningna khangashao ngarāna, kala athumwui morchaina zakkashimāng matui.

³Thangkhamei eina shim sākai, theishingkakhui eina shim pāna;

⁴awor kathem eina kābing aman kasaka kala khamathā lan eina chipema.

⁵Kapinga miliva thangkhamei mina pangmei, yāng khaleia mili theithangkhameina pangmei;

⁶kaja thangkhameiwui thānkhami eina nana rai sāshapa, kala hāngkachithei makhavātwui mangā eina rai yui.

⁷Mangkhama̱wui vang thangkhamei juilaka; ngaveili ana akhamor mamakāmana.

⁸Kashi [11] sākhavai khangarānali zeingaruikashe hora.

⁹Mangkhama̱wui khangarān hi moreina, kala mashātkathei hi mina ningkachai khavaina.

¹⁰Kasak kharā tharan, na vānhaiakha, nawui yāng ngazanlaka.

¹¹Thikhavai thanvāhaoki kajebingli ngatangkhuilu; shaothat khavaipam khangaphokbingli ngakhunkhuilu.

¹²Nathumna “Yanglu, ithum hi matheisamana” da hāngakha, ningla theiser kaje china matheimarala? Namanglā mayonkhame china matheimarala? Kala ana kachichāwui kasā athishurda athut makhuimimarala?

¹³Inaomayara, khuira̱ manglu, hi phālaka; khuihāngwui eina ngaya̱kata chi nakhamorli shimlaka.

¹⁴Theilu thangkhamei kaho hi manglāli chikathāna; nana chi samphangakha, naoda phākhavai lei, kala nawui kachihān makaimara.

¹⁵Khangarongawui pamkhavaili makhayā mina kasā thāda marimzatalu, ashi shimkhurli sāshida masaalu;

¹⁶kaja khangarong mina shini shida kongluiya, kala ngakarthuiluishita; kha makhayābingli unshimuina yuihaora.

¹⁷Nawui yangkashe kongkhalui tharan mamathānalu, kala aphei khangaphok tharan naningli mamathānalu;

¹⁸PROHOna chi theida maringphāpaishina, kala awui malungkhavāt awui eina ngareithuipaishina.

¹⁹Kashi [12] kasābingwui vang na khalatta maningkharikalu, kala makhayāli mayuishialu,

²⁰kaja makaphā miwui vang naoda chihān khavai maleimana, makhayāwui thaomei shimitmihaora.

²¹Inaomayara, PROHOli kala awungali ngacheelu, khaninili kahāng makhanganā masaalu;

²²kaja aniwui eina kashuirak kalāshāt rāpaishina, kala shimān khangasak aniwui eina rāra kaji khipāna theira?

²³Hila thangkhamabingwui chānsamna. Bichar kasāli mijang kasā maphāmana.

²⁴Makhayāli “Nawui khalāng maleimana” jiakha, mina khonshira, yurna yangkharingra;

²⁵kha makhayā mili hāngkhamachin mi chi ningyāngkhaung samphangra, kala athumwuitungli kaphā sokhami tārorra.

²⁶Khamashung tui ngahānkakā mina morchaili khamaya̱ samphanga.

²⁷Ayārli nawui ot ngaranfalu, luili nawui ot kachiva̱ khangarān sahaifalu; kala chiwui thili nawui shim sānaolu.

²⁸Angalang maleila nakhongnaiwuitungli shākhi masāphāphaalu, kala na morchai eina maminamalu.

²⁹“Ana ili kasā thāda inala ali sāmira; ana sākahai chiwui vang ina ali hanmira” da mahāngalu.

³⁰Chāngshewui lui, ning makhaleiwui drakhā yāmgui ina kanvai;

³¹kala yanglu, saikora chi ka̱shatna pukrorserhairasai; ngaleila kuivāna pemhairasai, kala chiwui lungkhomla kaitaserhairasai.

³²Chi theilaga ina machuka; ina yanga kala tamkakhui samphanga.

³³Kasha̱kha pikakhui, hunnakha ngasāmkakhui, kasha̱kha pāngmasa̱da khangasām eina,

³⁴chām kaho chi nali phama̱ kashao thāda, kala khavāt kaho chi zeighai kasing mi thāda rāra.