Read Tangkhul Naga CHĀNSAM 3 Bible Online

CHĀNSAM 3 - Tangkhul Naga bible

CHĀNSAM 3

¹Inaomayara, iwui tamkachithei mamalaihaialu; kha iwui ningkhami hi nawui wuklungli hailu;

²kaja nali china nawui mirin okkapei kala leikhayā mirin mira.

³Khayākashi kala ningkatongna nali mahorhairanu; chibing chi nakahungli neihailu, athum chi naningli kapisanghailu.

⁴ Chithākha Varewui mangalila kala miwui mangalila, ngahānkhangai kala khamasho samphangra.

⁵Naning tongda PROHOli horsanglu, na khalattawui theikhavā chili machihānalu.

⁶Nawui apong saikora ali theingasaklu, chieina ana nawui shongfa ngarong ngasakra.

⁷ Na khalattawui mikyan eina na thangmeiya majialu; PROHOli ngacheelu, kala makaphāwui eina ngareithuihaolu.

⁸China nawui asā kharai kala nara̱kui khangaveng ngasāra.

⁹Nawui khalalei kala matheikhare theishirai eina ngasoda PROHOli khayāshilu;

¹⁰chithākha nawui zatchum kachungkha mataisangra, kala nawui vaichumla pemtha̱-pemtai ngasakra.

¹¹ Inaomayara, PROHOwui kharākli maningkachaialu awui hāngkhamachinli masānhaialu,

¹²kaja PROHOna leikashe mili hāngmachina, avāva̱na khaluma naoli kasā thāda.

¹³Thangkhamei samkaphanga mi, kala theishingkakhui khalei mi chi ringphai,

¹⁴kaja chiwui tongkakhui china lupāsāwui eina tongkakhui kala, kala chiwui mataisangkakhuina sināwui eina mataisangkahuili phāmei.

¹⁵Ana muktāli lāngda aman sakmei, kala nana ningkachāng ot akhala chili ngaheokapai maleimana.

¹⁶Okkapei awui yāpāngli lei, kala awui uishong kashāng eina khayākakā lei.

¹⁷Awui apong ningyāngkhaung mānga, kala awui shongfa saikora chingri kahai mānga,

¹⁸ali khuikasangbing chi kharingwui thingrong kathāna; ali singtit kajibingli ringkaphā hoi.

¹⁹Thangkhamei eina PROHOna okathui sai; theishingkakhui eina ana kazingram sākai;

²⁰awui aworna kathuka chi ngachakkhaishok ngasaka, kala muiyāna ikra̱ tāmi.

²¹Inaomayara, kaphā thangkhamei eina ngasoda mashunning singtitlu; namikyanwui eina athumli mayām ngasakalu,

²²china namanglāwui kharing ngasāra, nakahungwui sāri ngasāra.

²³Chieina nawui apongli nana ningnganungda zatra; kala naphei mangaphokmara.

²⁴Nana pamzanglala[1] mangacheemara, nana ngayaikasang tharan nawui pikakhui shimlakra.

²⁵Kashuirak kahai khangachee, lah makaphaali shimān khangasak rālala mangacheealu;

²⁶kaja PROHOna nawui ningshai khavaina, kala ana naphei maphatthui khavai mayonmira.

²⁷Kaphā sāmikharānbingli masānhaialu, nana sāmikashap chi leilakha.

²⁸Nawui pāngli laleilaga, nawui khongnaiali, “Ungsalu, rāluinaolu, akhama ina minaora” da mahāngalu.

²⁹Nali ning horsangda khongnaikapama athumli, makaphā sākhavai khangarān masaalu.

³⁰Nali khikha khayon masālaga, maram maleila makhararalu.

³¹Sākashe mili mayuishilu, kala awui apong akhanidala masha̱alu,

³²kaja thānkhangui mi chi PROHOwui mangāli ningkakachaina, kha khangatara mi chili ana shitsangchaowa.

³³PROHOwui khonkashi chi makaphābingwui shimli lei; kha khamashungwui pamkhavaili ana somi.

³⁴ Mashātkazarbingli ana mashāta, kha khanimbingli ana ngahanngai.

³⁵Thangkhamana khayākakā samphangra, kha mangkhama̱na maikashi samphanga.