Read Tangkhul Naga CHĀNSAM 4 Bible Online

CHĀNSAM 4 - Tangkhul Naga bible

CHĀNSAM 4

¹O, inaomayara, avāva̱ akhana tamkachithei nganālu, machuktheishap khavai nganākhui kazaklu;

²kaja ina kaphā ningkhami khamina, iwui tamkachithei hi mahorhailakalu.

³Ishāvāwui mangāli naomayara sāda nganuizon eina leilakha, akhamāng kaje sāda ishāva̱wui miktāli leilakha,

⁴ana ili tamchitheida hānga, “Iwui tui naningli shāptithailu; iwui ningkhami nganāda okthuilu;

⁵chi mamalaihaialu, kala ikhamorwui tui hiwui eina mangareithuihaialu. Thangkhamei khuilu; theikakhui khuilu.

⁶Ali mahorhailakalu, ana mayonmira; ali leishilu ana nali ngākmira.

⁷Thangkhamei haophok khavai chi hina: Thangkhamei phākhuilu, kala samkaphaphang chili, ningli shāphailu.

⁸Aman saklakada phaninglu, chieina ana nali mai kāngasakra; ali ngavapakha, nali khayā kāngasakra.

⁹Nakuili ana khamathā pāsi ngakhāmmira; ana khamathā kuihon ngahonmira.”

¹⁰Nganālu, inaomayara iwui tui khuisanglu, chieina na okpeimeira.

¹¹Thangkhameiwui apongli ina nali tamchitheihaira; ina mashungrik kahai shongfali nali thānzathaira.

¹²Nana kazat tharan, nawui pheikār mahapkhanomara; kala nana yonglala mangaphokmara.

¹³Tamkachithei singtitta machihohailakalu; ali mayonkhuilu, kaja a nawui mirinna.

¹⁴Makaphābingwui apongli mazangalu, kala makaphā kasābingwui shongfali mazatalu.

¹⁵Chili mazangalu, chili mavaalu; chiwui eina ngareithuida kānthulu.

¹⁶Kaja athumna khalāng ot masāranglakha eina tangda mapimana, mili phei mangaphok ngasakranglakha eina tangda mik sip majimana.

¹⁷Kaja athumna makaphāwui kashakazā zai, kala khangashaowui ra̱shak manga.

¹⁸Kha khangarongbingwui shongfava zingthanlamwui kahor thāda, mangashunranglakha eina tangda horkhangai hora.

¹⁹Makaphāwui aponga kathuka tangkhamang thai; athumna khili phei ngaphokkhala da matheimana.

²⁰Inaomayara, iwui tui nganātitkhuilu, kahāng saikora nganākhuikazaklu.

²¹Chibing chi nawui mikyan eina mayāmthuihailakaranu; naningli haichinglu.

²²Kaja chi samkaphang a chiwui vanga manglā ringkhavaina, phasā kakazā saikora raikhavaina.

²³Nawui wuklung ningmazingda hailu; kaja chiwui eina kharing ura̱ woka,

²⁴kha̱khamakhei tui mamatuialu, kala mikhanam tui khamatui katāva̱li horhaolu.

²⁵Namik mangāshong ngatartei hailu, kala ngarongri namangāli ngashānlu,

²⁶ Napheina kazat shongfa ngasharda zatlu; chithākha nawui kazat kachiva̱ mangapatmara.

²⁷Yāshongla uishongla makārsangphaphālu, naphei makaphāwui eina ngareithuihaolu.