Read Tangkhul Naga CHĀNSAM 6 Bible Online

CHĀNSAM 6 - Tangkhul Naga bible

CHĀNSAM 6

¹Inaomayara, nakhongnaiwui vang nana nganingmiakha, kha̱miwui vang khangashit samiakha;

²namorchaiwui tuimatuili manhaiakha, makhamorwui tuiwui eina tukkhuihaiakha,

³hithāda sālaga nakhalatta huikhuilu, inaoamayara; kaja na nawui khongnaiwui pāngli tāzanghaira; thaklāk eina nawui khongnaili achamnākhuilu.

⁴Mapilakalu, sikhangutla masingutalu;

⁵sā kharengawui eina chaonaona, khalen kasanga pāngwui eina vānaona khayām thāda na khalatta yāmshokhaolu.

⁶Zālingli ayanglu, O chāngshe! awui otsak yangkhuilu, kala thangmeilu.

⁷Akhokala, otshinmela, khamungala maleila,

⁸ana lumkachāng kashakazā ngarānsanga, kala māhāli zākhavai kazipkhui.

⁹O chāngshe, na chili karankha pifarakhala? kapiwui eina na katharan thuira?

¹⁰ Kasha̱kha pikakhui, hunnakha ngasāmkakhui, kasha̱kha pāng masa̱da ngasāmkakhui eina,

¹¹kachām kaho china zaikazā mi thāda nali rāra, rai khavā mi thāda khavāt rāra.

¹²Makānkhanā makaphā mina kha̱khamakhei tui matuizata,

¹³mik kashiya, phei khayita, pāngmareng eina chiza̱zata,

¹⁴makhamashung ning eina makaphā ngarānkhuiya, kakai katek yaoshon-yaothai;

¹⁵chiwui vang eina unshimui awuitungli kashuirak eina rāra; hunkhawui alungli ngayānghaida masākhuiluipaimara.

¹⁶PROHO na ningkakachai tharuk lei, kashine hi awui yangkakharing otna:

¹⁷ngamsor kahai mikyan, kakapika male, khayon makhaleili ashee tākhangasak pāng,

¹⁸makaphā makhayā khangarān ning, makaphā otwui vang yongkazata phei,

¹⁹kakapik matuishokta khangui shākhi kasā, kala chinaongarāwui alungli kakai katek yaokasang.

²⁰Inaomayara, navāwui ningkhami mayonlu, kala nava̱wui tamkachithei mahorhaialu.

²¹Naningli atam kachida shāptithailu, nakahungli khalaptithailu.

²²Nana kazatli athumna nali thānmira, nana pikazang tharan athumna nali mayonmira; kala nana ngakarkathui tharan athumna nali ngazekngarumra.

²³Kaja ningkhami hi thaomei na, kala tamkachitheina kahorna; kala kharākwui hāngkhamachin mirinwui apongna,

²⁴makaphā sha̱naowui eina nali phārimi khavai, makhangatunva̱wui nganaipat kahai malewui eina kanmi khavaina.

²⁵Naningli awui azak khamathā chili maningchāngalu, kala awui mikhā china nali matuknarhaiaranu;

²⁶kaja khayorva̱̱li zāt ngahomkha eina masākhuipai; kha phokaphāva̱na[2] mayarnaowui mirin sāshimānmishapa.

²⁷Mi akhana makāli mei romphungda awui kachon machuimarala?

²⁸Chi maningakha mi akhana kasā meithātungli zatta aphei machuimarala?

²⁹Chithāda khongnai preiva̱li ngasokapi mi chi chikathāna; ali sākaza̱ mi saikorali tandi mamila mathuimana.

³⁰Thaihaoda thokhavai khale chili mina maningkachaimala?

³¹Kala ali tukkhuihaiakha, ana khum shini shida runra; awui shimli khalalei saikora mishokra.

³²Phokaphaa che ning mazangmana; chithāda kasā a che khalatta sākashimānna.

³³Khamāla za̱ra, maikashila samphangra, kala awui maishāt mapheothuipaimara.

³⁴Kaja yuikashina mi akhali malung thuingasaka, kala athut kakhui tharan mataimilakmara.

³⁵Shimān kahai runkakā chila ana makhuimara, nana mataida milala mamayāmara.