Read Tangkhul Naga CHĀNSAM 7 Bible Online

CHĀNSAM 7 - Tangkhul Naga bible

CHĀNSAM 7

¹Inaomayara, iwui tui mayonlu, kala iwui ningkhami naningli kaziphailu.

²Iwui ningkhami mayonda okthuilu, iwui tamkachithei namikli khamathā ot thāda hailu;

³napāngmarengli khalapshānhailu, naningli kapisanghailu.

⁴Thangmeili “Na izarva̱na” da hānglu; kala theishingkakhuili nawui khamashita ngasotnao da holu;

⁵kapā-khayong sha̱naowui eina nali phārimi khavai, makhangatunva̱wui chanhān khamathā chiwui eina.

⁶Kaja iwui shimwui charfakhur eina ina yangshoka,

⁷kala ina ningkashambingwui alungli theihaira, ina khanuithotbingwui alungli theihaira, ning makhalei yaronnao akha,

⁸ngalāva̱shi shimwui achikun ngalemli shongpong makānvāda shim chili vākhavai zata

⁹ngazinshong, meirong ngamānshap atamli.

¹⁰Kala yanglu, sha̱nao akhana ali rāngaroka, khayorva̱̱wui kachon ngavailaga, tengkuilak eina samphanga.

¹¹Ava mai shālak eina zatphāphā kaje, shimli phei mashongkaza̱ sha̱naona;

¹²chānreili, leihngapha̱li, achithek kachida ana ngaraipama.

¹³Ana mayara chili yonkhuilaga maya̱ya, kala maishālak eina hānga:

¹⁴“Ina pha̱kaphayā chigatkida lei, ina aja khangashit sāhaira;

¹⁵chieina nali samphang khavai kharāna, nali phākhuiphalungra da, samphangkachanghaira.

¹⁶Iwui pet masankazazakhaira, Egyptwui machu kashoka chonsā khamathā hamlaga;

¹⁷iwui pet ina myrrh, aloe kala sākom eina heirorhaira.

¹⁸Rālu, ngathor marāranglakha eina tangda leikashi chipemkhuisa, leikashi eina ini khalatta ningyāng ungrumsa.

¹⁹Kaja igahara shimli maleimana, a kharam katāvali vāhaira;

²⁰ana pheisā khaokhatkha khuiphungda thuihaira, kachāng nganikhawui thili ungnaora.”

²¹Chikathā suikaphanep tui eina ali suikhui, tāngpat kahai tui eina tandi sākhui.

²²Sā khayorpamli mukkā shimen khavā thāda, lah seichui tukkhui kahai thāda, ali konkon shurthuwa

²³akharili malāthing makāpza̱ranglakha; vānaona khalenli yongkasang thāda, awui manglā shimānra kaji mayara china matheimana.

²⁴Ara O inao ngarā, ili nganālu, ikhamorwui tui nganātitkhuilu.

²⁵Nawui ning ngalāva̱wui pongli mazangaranu, awui shongfali mazataranu;

²⁶kaja kachungkhali ana shimān ngasakhaira; mha, ana chithit kahai shānla makhuimana

²⁷Awui shim Kathewui ramwui apongna, kathi ram vākhavai apongna.