Read Tangkhul Naga CHĀNSAM 8 Bible Online

CHĀNSAM 8 - Tangkhul Naga bible

CHĀNSAM 8

¹ Thangmeina mahomala, Theishingkakhuina mangavaomala?

²Shongfaphei kajujuili, shongjan shongjanli ana nganinga;

³keinungwui ngavei ngalemli, zangkhavaipamlila ana pangda vaowa;

⁴“O mibing ina nathumli kahona, kala iwui khavao hi mi saikoralina.

⁵O ningkashambing, thangkhamei tamlu; O mangkhama̱bing, nganātitkhuilu.

⁶Nganālu, kaja ina kaphātui hāngra, kala imorchaiwui eina khamashung chi shokra;

⁷kaja ikhamorna mashuntui matuira; imorchaili makhayā chiya ningkachai.

⁸Ikhamorwui tui saikora khamashung khangarongsera; chili kapikung kapikkhavā lah kha̱khamakhei maleimana.

⁹Theishingkakhuibingwuivanga saikora khangatarmānga, kala awor samkaphangbingwui vanga khamashungna.

¹⁰Lupāsāwui mahutle iwui tui khuitha̱lu, kasaka sinale awor khuitha̱lu.

¹¹“Kaja chara̱-chasānli thangkhamei phāmei, nana ningkachāng saikora ali pāntam khavai maleimana.

¹²Thangmei, iva, thangkhameipamli pama, kala ina awor eina mashun phākhui.

¹³PROHOli khangachee hina makaphāli yangkakharingna. Lāngkaso kala khayāning khanganinga kala makaphāwui apong kala kapik kakhayang tuimatui ina yangkharinga.

¹⁴Hāngkachithei kala akachanga thangkhamei ili lei, theishingkakhui kala yāng ili lei.

¹⁵Iwui mangā eina awungabingna munga, ngalei khangākabingna tāzak tārak kahai mashun mi;

¹⁶iwui mangā eina wungnaobingna munga, kala khangambingna okathui munga.

¹⁷Ili leikashibing chili ina leishi, kala ili ningsanglak eina kaphābingna ili samphanga.

¹⁸Kashāng kala khayākakāla iwuili lei, makashimān lan kala mataikasangla.

¹⁹Iwui athei sināli phāmei, phākhamatai sinālila, iwui eina kashok kaphā ot lupāsālila phamei.

²⁰Khamashung khangarongwui apongli ina zata, mashun shongpongli,

²¹ili leikashibingli lan eina ngasoda somi, kala athumwui kazipshimbing pemngasaka.

²² “PROHOna awui ot haophokkhareli ili sākhui, achālakhawui sākharena.

²³Achalakha ili sākahaina, okathui masāranglakha ili sāri.

²⁴Kathuka chi maleiranglakha, makhavāt ura̱bing malongranglakha ili sāhairasai.

²⁵Phungreibing masāranglakha, phungrānao maleiranglakha ili sāhairasai;

²⁶okathui kala lui[3] zangda masāranglakha, apuk-apagawui khare chifa-chihā maleiranglakha.

²⁷Ana kazingram sākakā tharan I chili leihairasai, ana kathuka chiwui atung kuimareida kakhan tharan,

²⁸ana atungshongwui kazingram ngaziplak eina kasā tharan, kathuka chiwui ura̱ sākashok tharan,

²⁹shamadruwui angarit sākhami tharan, awui kakaso kaida tara̱na malongzatphāphāpai khavai ana okathuiwui apam ngayeikhami tharan,

³⁰I awui ngalemli leisai, ot sākatheia akha thāda; kala ina awui[4] thangkachidawui ningyāngkhaunga sāsai, awui mangāli atam kachida mathānsai,

³¹awui apuk-apaga chili ringphāda kala mikumo naomayarabingli ningyāngunga.

³²“Ara inaomayarabing, ili nganālu: iwui apong khamayonbing chi ringkaphāna.

³³Hangkachithei nganākhuida thangmeilu, kala chi mapairekhaialu.

³⁴Iwui ngaveili thangkachida mayonpamda, iwui khāmongpheili nganingpamda, ili khanganā mi chi ringkaphā ngasāra.

³⁵Kaja ili samkaphang china kharing samphanga, kala PROHOwui eina ngahānkhangai samphanga;

³⁶kha ili phāyon kahaibing khalatta khamā za̱khui; ili yangkakharingbing saikora kathili leishi.”