Read Tangkhul Naga HĀSHOKME 1 Bible Online

HĀSHOKME 1 - Tangkhul Naga bible

HĀSHOKME 1

¹Davidwui naomayara, Jerusalemwui awunga hashokmewui tuina.

²Aremawui arema, da hashokmena hānga, aremawui arema! saikora aremana.

³Zinghamli mikumona ngalangkazār saikora hiwui eina khi tongkakhui leikhala?

⁴Thotkha thui, thotkha rai, kha okathui chichinga.

⁵Zimikna shoka kala zimikna tuna, kala ana shokkhavaipamli unglui.

⁶Masina azingshong phantai, kala atungshong kuishanga; kuimareida masi china kuizata, kala awui shongfali hanunglui.

⁷Kong saikora shamadruli longsanga, kha shamadru kapem mavaimana; kongna longrā khavai shong chili thada longpapamluia.

⁸Ot saikora kakhanangna pema, mina mahangrarmana, kathei chi eina mikna mapenmana, lah kashā chin khanā mapemrarmana.

⁹Shokkahai chi shokluira; sākahai chi saluiki kaji chipapama; kala okathuili kadhar maleimana.

¹⁰“Yanglu, hi kadharana” da hāngkahai ot khaleila? Chiya achālakhawui eina ithumli rida leihairakasana.

¹¹Rida shokkahai chi maphaningluimana; naoda rākashok chila maphaningluimara

¹²Hāshokmena Jerusalemli Israelwui awunga sāsai.

¹³Kala okathuili sāda khalei saikora thangmei eina phākhui khavai kala phashok khavai ina iwui ning horsanga; mikumowui naomayarabingwui ningli Varena ngalang zarkhavai mikahai hi maringkaphā otna.

¹⁴Okathuili kasāsā ot kachiva̱ ina theiserhaira; kala yanglu, saikora aremana, masili khangahom kathāsera.

¹⁵Khamakhei chi mangatar ngasakluipaimana, kala khavāt chi mashānkhuirarmana.

¹⁶Ina I khalatta hānga, “Ili rida Jerusalemli leikasābingli langmeikharda ina thangkhamei haklak eina tamkhuihaira; kala iwui ningna awor kala thangkhameiwui theikakhui kachungkha samphanghaira.”

¹⁷Kala mangma̱sak, kapā kala thangkhamei theikhavai iwui ning horsangchaowa. Ina theikhuiya kaja hila khangatei maningmana kha masili khangahom kathāna.

¹⁸Kaja thangmeimei, kakhanang mataimei, kala theimataikhamei mi chi chotmataimei.